واشنگٹن ( پاک ترک نیوز) امریکا نے عالمی صحت اور انسانی امداد کے کئی اہم منصوبوں کے لیے مالی معاونت دوبارہ شروع کرتے ہوئے گزشتہ دو ماہ کے دوران تقریباً 2 ارب ڈالر کی نئی امدادی رقوم دینے کے وعدے کیے ہیں۔
غیر ملکی میڈیا کے مطابق امریکی محکمہ خارجہ نے گزشتہ ہفتے کانگریس کو آگاہ کیا کہ کم آمدنی والے ممالک میں بچوں کی حفاظتی ویکسین کی فراہمی کے لیے کام کرنے والے عالمی ادارے کو 60 کروڑ ڈالر فراہم کیے جائیں گے۔
یہ فیصلہ ایک سال بعد سامنے آیا ہے، جب امریکی وزیر صحت رابرٹ ایف کینیڈی جونیئر نے اس ادارے کے لیے امریکی تعاون ختم کر دیا تھا۔
رپورٹ کے مطابق امریکا نے بھوک، غذائی قلت، تپِ دق اور دیگر عالمی صحت کے مسائل پر کام کرنے والے مختلف بین الاقوامی اداروں کے لیے بھی مالی امداد بحال کی ہے۔
زیادہ تر رقوم وہ ہیں جن کی منظوری کانگریس پہلے ہی دے چکی تھی، تاہم جنوری 2025 میں صدر ڈونلڈ ٹرمپ کی حکومت کی جانب سے غیر ملکی امداد منجمد کیے جانے کے باعث ان کی ادائیگی رکی ہوئی تھی۔
یہ بھی پڑھیں: امریکی بینک کیپیٹل ون نے ٹرمپ آرگنائزیشن کے اکاؤنٹس منی لانڈرنگ خدشات پر بند کیے، عدالتی دستاویزات
امریکی حکام نے تاحال یہ واضح نہیں کیا کہ آیا یہ امداد مستقل بنیادوں پر بحال کی جا رہی ہے یا یہ صرف محدود نوعیت کا اقدام ہے۔ تاہم ذرائع کا کہنا ہے کہ محکمہ خارجہ عالمی شراکت داریوں کو جزوی طور پر بحال کرنے کے لیے مختلف اداروں سے رابطے میں ہے۔
