ایڈنبرا(پاک ترک نیوز)انگلینڈ اور آسٹریلیا کے بعد اسکاٹ لینڈ کا بھی افغانستان کے ساتھ دوطرفہ کرکٹ نہ کھیلنے کا فیصلہ، افغان کرکٹ بورڈ کی ٹریننگ کی درخواست بھی مسترد کردی۔
کرکٹ اسکاٹ لینڈ نے افغانستان میں خواتین اور لڑکیوں کے ساتھ روا رکھے جانے والے سلوک اور انسانی حقوق کی صورتحال کے پیش نظر افغان ٹیم کے ساتھ دوطرفہ کرکٹ سیریز نہ کھیلنے کا اعلان کردیا۔
کرکٹ اسکاٹ لینڈ کے مطابق افغان کرکٹ بورڈ نے جولائی میں آئرلینڈ کے خلاف سیریز سے قبل ٹریننگ کی سہولیات فراہم کرنے کی درخواست کی تھی، جسے مسترد کردیا گیا ہے۔
اعلامیے میں واضح کیا گیا ہے کہ اسکاٹ لینڈ افغانستان کے ساتھ کسی سہ فریقی سیریز میں بھی شرکت نہیں کرے گا، جبکہ افغان ٹیم کے ساتھ ٹریننگ کیمپس، پریکٹس میچز اور وارم اپ مقابلے بھی نہیں کھیلے جائیں گے۔
تاہم اسکاٹ لینڈ آئی سی سی کے بین الاقوامی مقابلوں میں افغانستان کے خلاف کھیلنا جاری رکھے گا۔
کرکٹ اسکاٹ لینڈ کا کہنا ہے کہ آئی سی سی ایونٹس میں افغان ٹیم کے خلاف شرکت کو افغانستان کی موجودہ حکومت یا اس کی پالیسیوں کی حمایت تصور نہ کیا جائے۔
یہ بھی پڑھیں: تربیلا ٹی فائیو پاور پراجیکٹ کا تعمیراتی حصہ منہدم، چیئرمین واپڈا آج جائے حادثہ کا دورہ کریں گے
اعلامیے کے مطابق افغانستان میں خواتین کی کرکٹ اور انسانی حقوق کی صورتحال میں بہتری تک یہ پابندی برقرار رہے گی۔
مزید کہا گیا ہے کہ افغانستان پریمیئر لیگ میں اسکاٹ لینڈ کے کھلاڑیوں کی شرکت کو بھی افغان حکومت یا اس کی پالیسیوں کی حمایت نہیں سمجھا جانا چاہیے۔
