کراچی (پاک ترک نیوز )کراچی کے نوجوان میر رضا کیس میں اہم پیش رفت سامنے آئی ہے، میر رضا کی شرٹ کی کیمیائی جانچ مکمل ہونے کے بعد رپورٹ پولیس کو موصول ہوگئی ہے۔
تفتیشی ذرائع کے مطابق شرٹ کے کیمیائی تجزیے کے دوران تیزاب کے شواہد ملے ہیں، جبکہ میر رضا کے خون کے نمونے میں بے ہوشی کی دوا کے اجزا بھی پائے گئے ہیں۔
ذرائع کا کہنا ہے کہ میر رضا کی شرٹ سے گن شاٹ ریزیڈیو یعنی جی ایس آر بھی ملا ہے، جو کمر کے حصے پر موجود تھا۔ شرٹ کے کمر والے حصے پر جی ایس آر کی زیادہ مقدار اس امر کی نشاندہی کرتی ہے کہ گولی کمر کی جانب سے لگی۔
تفتیشی ذرائع کے مطابق میر رضا کی شرٹ کو چند روز قبل کیمیائی تجزیے کے لیے لیبارٹری بھجوایا گیا تھا، جس کی رپورٹ اب پولیس کو موصول ہوگئی ہے۔
یہ بھی پڑھیں:کراچی کے نوجوان تاجر میر رضا کی قبرکشائی
دوسری جانب میر رضا کیس کی تفتیش میں پولیس کی مزید کوتاہیاں بھی سامنے آگئی ہیں۔
تفتیشی حکام کے مطابق واقعے کو کئی روز گزرنے کے باوجود جائے وقوع کی جیو فینسنگ نہیں کروائی گئی، جبکہ میر رضا کے موبائل فون کا ڈیٹا ریکارڈ بھی تاحال حاصل نہیں کیا جا سکا۔
تفتیشی حکام کا مزید کہنا ہے کہ میر رضا کی اسمارٹ واچ کا فرانزک تجزیہ بھی ابھی تک نہیں کروایا گیا، جس کے باعث تفتیش کے اہم پہلوؤں پر سوالات اٹھ رہے ہیں۔
