پشاور ( پاک ترک نیوز) خیبرپختونخوا کے ضلع بنوں میں پولیس نے بروقت اور مؤثر کارروائی کرتے ہوئے پولیس چوکی کنگر پل پر دہشتگردوں کا حملہ ناکام بنا دیا، فائرنگ کے تبادلے اور سرچ آپریشن کے دوران چار دہشتگرد ہلاک ہوگئے۔پولیس حکام کے مطابق نصف شب جدید ہتھیاروں سے لیس مسلح دہشتگردوں نے پولیس چوکی کنگر پل پر اچانک حملہ کیا، تاہم چوکی پر تعینات مستعد اہلکاروں نے فوری جوابی کارروائی کرتے ہوئے حملہ پسپا کردیا۔
واقعے کی اطلاع ملتے ہی پولیس لائنز سے کوئیک رسپانس فورس، ریپڈ رسپانس فورس اور اضافی نفری جائے وقوعہ پر پہنچ گئی، جبکہ سی ٹی ڈی کے اہلکاروں نے بھی کلیئرنس اور سرچ آپریشن میں حصہ لیا۔آپریشن کے دوران چار ہلاک دہشتگردوں کی لاشیں برآمد ہوئیں، جن کی شناخت کا عمل جاری ہے۔ ہلاک دہشتگردوں کے قبضے سے چار کلاشنکوفیں، متعدد میگزین، بھاری مقدار میں گولہ بارود، دستی بم اور بندولیئرز بھی برآمد کیے گئے۔انسپکٹر جنرل پولیس خیبرپختونخوا ذوالفقار حمید نے دہشتگردوں کا حملہ ناکام بنانے پر بنوں پولیس کو شاباش دیتے ہوئے کہا کہ رات کی تاریکی میں حملہ کرنے کی کوشش کو پولیس جوانوں نے اپنی اعلیٰ تربیت، پیشہ ورانہ مہارت اور بہادری سے ناکام بنایا۔
یہ بھی پڑھیں: ترکیہ اور قطر کے درمیان مشترکہ دفاعی معاہدہ طے، اردوان اور امیر قطر کی اہم ملاقات
آئی جی پی کا کہنا تھا کہ خیبرپختونخوا کی سرزمین پر دہشتگردوں کے لیے کوئی جگہ نہیں، دہشتگردی کے مکمل خاتمے کے لیے مؤثر حکمت عملی کے تحت کارروائیاں جاری ہیں۔انہوں نے کہا کہ عوام کی جان و مال کا تحفظ پولیس کی اولین ترجیح ہے اور دہشتگردی کے اس ناسور سے صوبے کی سرزمین کو پاک کیا جائے گا۔
