بیجنگ ( پاک ترک نیوز) چینی کمپنی بی وائی ڈی نے گاڑیوں کی دنیا میں ایک اور بڑا دھماکا کر دیا۔۔۔ ایک ایسی جدید الیکٹرک گاڑی متعارف کرا دی ہے جس میں ٹیکنالوجی کے ایسے فیچرز شامل ہیں جو مہنگی ترین لگژری گاڑیوں کو بھی پیچھے چھوڑ سکتے ہیں۔کمپنی کی نئی سیل زیرو سیون نہ صرف اپنی جدید بیٹری اور انتہائی تیز رفتار چارجنگ کی وجہ سے توجہ حاصل کر رہی ہے بلکہ اس کا سب سے حیران کن فیچر ایک ایسا ذہین سسپنشن سسٹم ہے جو سڑک کی صورتحال کو سمجھ کر محض چند ملی سیکنڈ میں گاڑی کے توازن اور جھٹکوں کو کنٹرول کر سکتا ہے۔
بی وائی ڈی نے گزشتہ ہفتے سیل زیرو سیون کی دوسری جنریشن متعارف کرائی ہے۔ یہ گاڑی دو مختلف ورژنز میں دستیاب ہے۔ ایک مکمل الیکٹرک جبکہ دوسرا پلگ اِن ہائبرڈ ورژن ہے۔اس گاڑی کی لمبائی پانچ ہزار اسی ملی میٹر، چوڑائی ایک ہزار نو سو ساٹھ ملی میٹر اور وہیل بیس دو ہزار نو سو ساٹھ ملی میٹر ہے۔ یعنی جسامت کے اعتبار سے یہ ٹویوٹا کیمری سے بھی بڑی ہے۔
نئی الیکٹرک سیل زیرو سیون میں 76.7 کلو واٹ آور کی دوسری جنریشن بلیڈ ایل ایف پی بیٹری دی گئی ہے، جو چینی سی ایل ٹی سی معیار کے مطابق ایک مرتبہ مکمل چارج ہونے پر 775 کلومیٹر تک سفر کر سکتی ہے۔کمپنی کے مطابق بی وائی ڈی کی فلیش چارجنگ ٹیکنالوجی کی مدد سے گاڑی کی بیٹری صرف پانچ منٹ میں 10 فیصد سے 70 فیصد تک چارج ہو سکتی ہے، جبکہ 10 سے 97 فیصد چارج ہونے میں صرف نو منٹ لگتے ہیں۔یعنی اتنی دیر میں گاڑی چارج ہو سکتی ہے جتنی دیر میں آپ ایک کپ چائے بھی مشکل سے پیتے ہیں۔تاہم اس گاڑی کا سب سے منفرد فیچر ڈسَس ایم انٹیلی جنٹ میگنیٹوریولوجیکل باڈی کنٹرول سسٹم ہے۔یہ بی وائی ڈی کی پہلی گاڑی ہے جس میں یہ جدید سسٹم متعارف کرایا گیا ہے۔ اس ٹیکنالوجی میں گاڑی کا سسپنشن سڑک کی صورتحال کے مطابق خود کو ایڈجسٹ کرتا ہے۔ لائیڈار سینسرز کی مدد سے سڑک کی سطح کو محسوس کیا جاتا ہے اور پھر سسپنشن کی سختی اور نرمی کو ملی سیکنڈز میں تبدیل کیا جا سکتا ہے۔
یہ بھی پڑھیں: پنجاب کے 475 دیہات کی ترقی کے لیے 23 ارب 85 کروڑ روپے منظور، ہر گاؤں کو 5 کروڑ ملیں گے
اس کا مقصد خراب سڑکوں، موڑوں اور اچانک بدلتی صورتحال میں گاڑی کو زیادہ مستحکم رکھنا اور مسافروں کو جھٹکوں سے بچانا ہے۔گاڑی کے اندر بھی لگژری کا خاص خیال رکھا گیا ہے۔ اس میں 15.6 انچ کی فلوٹنگ انفوٹینمنٹ اسکرین، 10.25 انچ کا ڈیجیٹل انسٹرومنٹ کلسٹر، پچھلی نشستوں پر تفریح کے لیے دو مزید اسکرینز، اسمارٹ ریفریجریٹر اور زیرو گریوٹی سیٹس دی گئی ہیں۔اس کے علاوہ ایک خاص اسمارٹ واچ بھی متعارف کرائی گئی ہے جس کے ذریعے ڈرائیور گاڑی کے مختلف فیچرز کو دور بیٹھ کر کنٹرول کر سکے گا۔
قیمت کی بات کریں تو پلگ اِن ہائبرڈ ورژن کی ابتدائی قیمت ایک لاکھ 39 ہزار 900 چینی یوان جبکہ مکمل الیکٹرک ورژن کی قیمت ایک لاکھ 49 ہزار 900 یوان رکھی گئی ہے۔جبکہ جدید ترین ڈسَس ایم سسٹم والے ٹاپ الیکٹرک ماڈل کی قیمت ایک لاکھ 72 ہزار 900 یوان ہے۔پاکستانی روپے میں یہ قیمتیں تقریباً 55 لاکھ سے 68 لاکھ روپے کے درمیان بنتی ہیں، تاہم یہ براہ راست کرنسی تبدیلی ہے، درآمدی ٹیکس اور دیگر اخراجات شامل نہیں۔
