اسلام آباد ( پاک ترک نیوز) وفاقی وزیر صحت مصطفیٰ کمال نے نئے صوبوں کے قیام کو ریاست کی ضرورت قرار دے دیا۔ کہتے ہیں صوبے بنانا غیر آئینی یا غیر قانونی نہیں، ریاست کو بچانے اور بہتر انداز میں چلانے کے لیے نئے صوبے ناگزیر ہیں۔ ایران میں 17 جبکہ بھارت میں 38 صوبے ہیں، پاکستان کے چار صوبوں کو 8 ہزار 884 ارب روپے ملے ہیں۔کراچی میں تقریب سے خطاب کرتے ہوئے مصطفیٰ کمال کا کہنا تھا کہ کراچی پاکستان کا ریونیو انجن ہے، یہ شہر آج بھی پورے ملک کو کما کر دیتا ہے اور پاکستان کو معاشی دلدل سے نکالنے کی صلاحیت رکھتا ہے۔
دوسری جانب وفاقی وزیر صحت نے سندھ میں الائیڈ ہیلتھ کونسل کے ریجنل آفس کا افتتاح بھی کیا۔ ان کا کہنا تھا کہ اب سندھ کے طلبہ، تعلیمی اداروں اور الائیڈ ہیلتھ پروفیشنلز کو اپنے کاموں کے لیے اسلام آباد کے چکر نہیں لگانے پڑیں گے، تمام امور کراچی میں ہی انجام پائیں گے۔مصطفیٰ کمال کے مطابق ون ونڈو سہولت شروع کر دی گئی ہے، جہاں تمام معلومات اور شکایات کا حل ایک ہی جگہ دستیاب ہوگا۔ اس اقدام سے ہزاروں اداروں اور لاکھوں پروفیشنلز کی دیرینہ مشکلات ختم ہوں گی۔وفاقی وزیر صحت نے انکشاف کیا کہ پاکستان میں 9 لاکھ نرسوں کی کمی ہے جبکہ دنیا پاکستان سے 25 لاکھ نرسیں مانگ رہی ہے۔ ان کا کہنا تھا کہ ماضی میں نرسنگ کونسل میں مافیا موجود تھا اور لوگوں نے اسے کاروبار بنا رکھا تھا، نرسنگ کالجوں کے قانون میں تبدیلی اور نظام کو ڈیجیٹلائز کیا جا رہا ہے۔
یہ بھی پڑھیں: بنوں میں پولیس چوکی پر دہشتگردوں کا حملہ ناکام، چار خوارج ہلاک
مصطفیٰ کمال نے کہا کہ کونسل اور ریگولیٹری نظام مضبوط ہوگا تو پیسے لے کر کسی کو سیٹ نہیں مل سکے گی۔ الائیڈ ہیلتھ پروفیشنلز کی تعلیم اور مہارت میں کمی کے سنگین نتائج ہو سکتے ہیں، اس لیے تعلیمی اداروں کی منظوری اور نگرانی کا نظام بھی مؤثر بنانا ضروری ہے۔
