لاہور(پاک ترک نیوز)
بگ بیش لیگ 15کے فائنل معرکہ میں سڈنی سکسرز اور پرتھ سکارچرز کے درمیان کل جوڑ جائے گا ۔
دونوں ٹیمیں ٹرافی کے حصول کیلئے ایڑی چوٹی کا زور لگائیں گی ۔ آخری معرکہ پرتھ کے گرائونڈ میں کھیلا جائے گا ۔ سڈنی سکسرز اور پرتھ سکارچرز نے بگ بیش لیگ سیزن 15میں 10،10میچز کھیلے ہیں ۔ پرتھ سکارچرز نے 7جبکہ سڈنی سکسرز نے 6میچز میں کامیابی سمیٹی تھی ۔
ابھی تک بگ بیش لیگ میں سب سے زیادہ رنز بنانے والے کھلاڑی ڈیوڈ وارنر ہیں جنہوں نے 8میچز میں حصہ لیا اور 433سکور کئے ہیں جبکہ فن ایلن 430رنز کے ساتھ دوسری پوزیشن پر موجود ہیں۔
سب سے زیادہ وکٹوں کی بات کی جائے پاکستان کے فاسٹ بائولر حارث رئوف بی بی ایل سیزن 15میں سب سے زیادہ 20وکٹیں لے کر ٹاپ بائولر رہے ہیں ۔ ایڈورڈ 18وکٹیں حاصل کر کے دوسرے نمبر پر ہیں۔
پرتھ سکارچرز اور سڈنی سکسرز اس سیزن میں کوالیفائر میں آخری بار ایک دوسرے مد مقابل آئے تھے جہاں سکارچرز نے کامیابی سمیٹی تھی اور فائنل میں جگہ پکی کی تھی ۔
واضح رہے کہ قومی مایہ ناز بلے باز بابر اعظم پہلی بار بگ بیش لیگ کا حصہ بنے تھے تاہم وہ خاص تاثر چھوڑنے میں ناکام رہے ہیں اور انہوں نے 10میچز کھیلے تاہم وہ محض 202رنز ہی سکور کرپائے ان کا سٹرائیک ریٹ 103رہا ۔
بابراعظم آسٹریلیا کیخلاف ٹی ٹونٹی سیریز میں حصہ لینے کیلئے بگ بیش لیگ چھوڑ کر وطن واپس آ چکے ہیں اور انہیں سکواڈ کا حصہ بھی بنایا گیا ہے ۔
یاد رہے کہ بابراعظم ٹی ٹونٹی انٹرنیشنل میں دنیا کے سب سے زیادہ رنز بنانے والے کھلاڑی ہیں انہوں نے پاکستان کی نمائندگی کرتے ہوئے 136میچز میں 4429رنز سکور کر رکھے ہیں ۔ان کا سٹرائیک ریٹ 128.45ہے۔
