وزیراعظم کا عالمی یوم تعلیم پر خصوصی پیغام، تعلیم وتربیت سے وابستہ افراد کو خراج عقیدت

اسلام آباد: (پاک ترک نیوز)وزیراعظم محمد شہباز شریف نے عالمی یوم تعلیم پر جاری اپنے پیغام میں کہا ہے کہ پاکستان اقوام عالم کے ساتھ ہم آواز ہو کر بھرپور انداز میں دنیا بھر اور بالخصوص پاکستان کے تعلیم و تربیت سے وابستہ تمام افراد کو خراج عقیدت پیش کرتا ہے۔
وزیراعظم نے کہا کہ ذاتی طور پر آج تمام عوام، طلبہ و طالبات، اساتذہ،والدین، معلمین اور محققین کو دلی مبارکباد پیش کرتا ہوں جو ملک بھر میں تعلیم و تربیت اور علم کے فروغ کے لیے کوشاں ہیں۔ اس سال یہ عالمی دن “تعلیم کی مشترکہ تشکیل میں نوجوانوں کی طاقت” کے نہایت موزوں عنوان کے تحت منایا جارہا ہے۔ یہ عنوان ہمارے دور میں نوجوان طبقہ کی نظام تعلیم میں بطور ایک فعال شراکت دار ہونے کی ترجمانی کرتا ہے۔ ایسا نظام تعلیم جو عصر حاضر، جدت اور مستقبل کے تقاضوں سے ہم آہنگ، جامع اور موثر ہو۔ نوجوانوں کی تخلیقی صلاحیتیں اورجدت آموز امنگیں یقینی طور پر نظام تعلیم کی درست سمت میں ترقی کا باعث بنیں گی۔
وزیراعظم شہباز شریف نے کہا کہ پاکستان کی باصلاحیت نوجوان آبادی ہمارے ملک کا قیمتی اثاثہ ہیں۔ ان کو تعلیم و تربیت، معیاری استعدار کار اور ہنر مندی کے بہترین مواقع فراہم کرنا حکومت کی اولین ترجیحات میں شامل ہے۔ پاکستان کا آئین بالخصوص آرٹیکل 25-اے, وفاقی اور صوبائی حکومتیں کی تعلیم کے فروغ اور اصلاحات سے متعلق رہنمائی کرتا رہے گا۔
انہوں نے کہا کہ دور حاضر کی باہم منسلک اور ٹیکنالوجی سے مزین دنیا میں علم و تعلیم کے موجودہ طریق میں تنقیدی سوچ، جدت، ڈیجیٹل مہارت، اخلاقی اقدار اور عملی صلاحیتوں کو جذب کرنے میں ہی انفرادی اور قومی فلاح و ترقی کا راز پنہاں ہے۔ حکومت پاکستان تعلیم کے نظام کو موثر اور نوجوانوں کو بااختیار بنانے کے لیے اعلی تعلیم اور مہارتوں کے فروغ پر مختلف پروگرامز کے ذریعے خصوصی توجہ دے رہی ہے۔ ان پروگرامز میں اعلیٰ تعلیم کے لیے توسیع شدہ وظائف، میرٹ کی بنیاد پر مالی معاونت اور وزیراعظم لیپ ٹاپ اسکیم شامل ہے۔ ان پروگرامز کا مقصد طلبہ کو ڈیجیٹل وسائل تک رسائی، تحقیقی صلاحیت میں اضافہ اور بین الاقوامی سطح کے علم و معیشت سے ہم آہنگ ہونے کے مواقع فراہم کرنا ہے۔ تمام طبقات سے وابستہ نوجوانوں کو بااختیار بنانے کی حکمت عملی کا ایک اہم پہلو فنی اور پیشہ ورانہ تعلیم و تربیت کا فروغ ہے۔ تاکہ ہنر مندی اور مہارت قومی ضروریات اور عالمی مواقع کے عین مطابق ہوں۔
وزیراعظم یوتھ اسکلز ڈیولپمنٹ پروگرام کے تحت نیشنل ووکیشنل اینڈ ٹیکنیکل ٹریننگ کمیشنکے ذریعے ملک بھر میں موثر اور حسب ضرورت تربیت کے متعدد اقدامات کیے جا رہے ہیں۔ان اقدامات میں مصنوعی ذہانت، روبوٹکس، آٹومیشن اور جدید ٹیکنالوجیز جیسے ابھرتے ہوئے شعبوں میں مہارتوں کی تربیت شامل ہے۔ قومی سطح پر ہنر مندی کے لیے اقدامات کے ذریعے مدارس کے نوجوانوں کو بھی قومی نظام میں شامل کیا جا رہا ہے تاکہ وہ باوقار روزگار اور کاروباری مواقع سے مستفید ہوتے ہوئے معاشرے میں مثبت کردار ادا کریں۔
وزیراعظم نے کہا کہ خواتین کے لیے خاص پروگرامز کے ذریعے تکنیکی، ڈیجیٹل اور گھریلو بنیادوں پر مہارتوں کو فروغ دیا جا رہا ہے تاکہ خواتین کی معاشی شمولیت اور معاشی خودانحصاری کو تقویت ملے۔ آج عالمی یوم تعلیم پر میں تمام تعلیمی اداروں، طلباء و طالبات، معلمین و اساتذہ کرام، والدین اور سول سوسائٹی سے گذارش کرتا ہوں کہ آئیے مل کر نوجوانوں اور آنے والی نسلوں کے لیے ایسے تعلیمی ماحول کو تشکیل دیں جو معیاری نظریہ و فکر ، تمام طبقات کی شمولیت، محنت کی عظمت، علم و تحقیق کے جدید تقاضوں اور عمر بھر سیکھنے کے جذبے کو فروغ دیتا ہو۔ آئیے اس عزم کی تجدید کریں کہ نوجوانوں کے تابناک مستقبل کو تعلیم اور ہنر و مہارت کے نظام کا محور بنائیں گے اور ایک ایسا تعلیمی نظام تشکیل دیں گے جو ہر فرد صلاحیتوں کو نکھارے، مساوات کو فروغ دے اور آنے والی نسلوں کو امن و استحکام ، ترقی و خوشحالی کی منزل کی جانب پاکستان کی قیادت کے لیے تیار کرے۔