کوئٹہ ( پاک ترک نیوز) کوئٹہ کے نواحی علاقے سورینج میں کوئلے کی کان میں ہونے والے خوفناک دھماکے کے نتیجے میں جاں بحق مزدوروں کی تعداد 35 ہوگئی ، جبکہ دیگر کان کنوں کو نکالنے کے لیے ریسکیو آپریشن جاری ہے۔
کان کے مالک کے مطابق دھماکے کے وقت کان کے اندر 42 مزدور موجود تھے اور ابتدائی اطلاعات کے مطابق دھماکہ میتھین گیس بھر جانے کے باعث ہوا۔ جاں بحق اور متاثرہ مزدوروں کا تعلق خیبرپختونخوا کے ضلع شانگلہ سے بتایا جا رہا ہے۔
ریسکیو ٹیمیں کان میں پھنسے مزدوروں کو نکالنے کے لیے امدادی کارروائیاں جاری رکھے ہوئے ہیں، جبکہ متعلقہ ادارے واقعے کی وجوہات کا تعین کر رہے ہیں۔
یہ بھی پڑھیں: شہداء پر سیاست ناقابلِ قبول، دہشت گردی کا ہر محاذ پر مقابلہ کریں گے: سرفراز بگٹی
دوسری جانب وزیراعلیٰ بلوچستان نے افسوسناک واقعے کا نوٹس لیتے ہوئے فوری رپورٹ طلب کر لی ہے۔ انہوں نے ہدایت کی ہے کہ اگر تحقیقات میں کسی قسم کی غفلت یا کوتاہی ثابت ہوئی تو ذمہ داروں کے خلاف سخت قانونی کارروائی عمل میں لائی جائے گی۔
