تہران ( پاک ترک نیوز) ایران کے خلاف جنگ طول پکڑ گئی۔۔۔ تو سمندر میں تعینات امریکی فوجیوں کا صبر بھی جواب دینے لگا؟
امریکی طیارہ بردار بحری بیڑے پر طویل تعیناتی، مسلسل ڈیوٹی اور مبینہ بنیادی سہولیات کی قلت نے اہلکاروں کو شدید ذہنی دباؤ سے دوچار کردیا۔۔۔ امریکی میڈیا نے چونکا دینے والے دعوے کردیئے۔
امریکی طیارہ بردار بحری جہاز یو ایس ایس ابراہم لنکن۔۔۔ جہاں جنگی مشن کے لیے تعینات ہزاروں امریکی سیلرز اور میرینز طویل عرصے سے سمندر میں موجود ہیں۔
امریکی میڈیا رپورٹس کے مطابق طویل اور مسلسل تعیناتی کے باعث بعض اہلکار شدید ذہنی دباؤ کا شکار ہوئے۔۔۔ اور متعدد اہلکاروں نے سمندر میں کود کر اپنی زندگی ختم کرنے کی کوشش کی۔
امریکی نیوز ویب سائٹ کے مطابق ایک اہلکار کی اہلیہ نے دعویٰ کیا کہ مسلسل ڈیوٹی اور طویل تعیناتی سے پریشان ان کے شوہر نے بھی جہاز سے چھلانگ لگانے کی کوشش کی۔
رپورٹ کے مطابق جہاز کے عملے نے ایسے کئی واقعات میں مداخلت کرکے اہلکاروں کو انتہائی قدم اٹھانے سے روکا۔
یہ دعوے سامنے آنے کے بعد امریکی طیارہ بردار بحری بیڑے پر اہلکاروں کی صورتحال پر سوالات اٹھنے لگے ہیں۔
میڈیا رپورٹس کے مطابق تقریباً 5 ہزار امریکی سیلرز اور میرینز 250 روز سے زائد عرصے سے جہاز پر تعینات ہیں۔۔۔ طویل جنگی مشن نے اہلکاروں کی جسمانی اور ذہنی برداشت کا سخت امتحان لینا شروع کردیا ہے۔
رپورٹ میں امریکی بحری بیڑے پر خوراک اور بنیادی اشیائے ضروریہ کی مبینہ قلت کا دعویٰ بھی کیا گیا ہے۔
دوسری جانب امریکی سینیٹرز نے ان واقعات کی تحقیقات کا مطالبہ کردیا ہے۔۔۔ تاکہ یہ معلوم کیا جاسکے کہ طویل تعیناتی کے دوران اہلکاروں کو درپیش مسائل کیا ہیں اور ان کی ذہنی صحت کے لیے مناسب سہولیات فراہم کی جارہی ہیں یا نہیں۔
یہ بھی پڑھیں: دنیا نے ایسی معاشی تنہائی پہلے کبھی نہیں دیکھی ہوگی، امریکا کی ایران کو بڑی دھمکی
تاہم امریکی بحریہ نے جہاز پر تعینات اہلکاروں میں خودکشی کی کوششوں یا ذہنی صحت کے مسائل میں اضافے کی تردید کی ہے۔
یعنی ایک طرف امریکی میڈیا کے چونکا دینے والے دعوے۔۔۔ دوسری طرف امریکی بحریہ کی تردید۔۔۔ لیکن سوال برقرار ہے کہ آخر طویل جنگ اور مسلسل تعیناتی امریکی فوجیوں پر کس حد تک اثر انداز ہورہی ہے؟
ایران کے خلاف جنگ جتنی طویل ہوتی جارہی ہے، اتنا ہی امریکی فوجیوں پر دباؤ بڑھنے کے خدشات بھی سامنے آرہے ہیں۔۔۔ اب نظریں امریکی حکام کی ممکنہ تحقیقات پر ہیں کہ یو ایس ایس ابراہم لنکن پر تعینات اہلکاروں کو درپیش مسائل کی اصل حقیقت کیا ہے۔
