واشنگٹن ( پاک ترک نیوز) امریکا نے ایران کے ساتھ مبینہ تعاون اور اس کے تیل و فضائی نیٹ ورک کی معاونت کے الزام میں بھارت اور ترکیہ کی کمپنیوں اور متعدد افراد پر نئی پابندیاں عائد کردی ہیں۔برطانوی میڈیا کے مطابق بھارت میں مقیم سنیل کمار شرما اور ان کی اہلیہ جسپریت پریتی بھی امریکی پابندیوں کی زد میں آگئے ہیں، جبکہ سنیل کمار شرما سے منسلک مزید 9 اداروں کو بھی پابندیوں کی فہرست میں شامل کرلیا گیا ہے۔امریکی حکام نے دونوں پر فراڈ کے ذریعے ایران کے خفیہ آئل ٹینکر نیٹ ورک کی معاونت کا الزام عائد کیا ہے۔
یہ بھی پڑھیں: ساف فٹبال چیمپیئن شپ: پاکستان اور بھارت آج آمنے سامنے ہونگے
امریکی محکمہ خزانہ کے مطابق مذکورہ نیٹ ورک ایران سے تیل کی ترسیل کرنے والے جہازوں کو جعلی پرچم اور سرٹیفکیٹس فراہم کرتا تھا۔دوسری جانب ایران کے فضائی شعبے کی معاونت کے الزام میں ترکیہ کی ایک کمپنی پر بھی پابندیاں عائد کردی گئی ہیں۔امریکی وزیر خزانہ اسکاٹ بیسنٹ کا کہنا ہے کہ ایرانی حکومت کی مسلسل معاونت کرنے والے افراد اور اداروں کے خلاف پابندیوں کا سلسلہ جاری رکھا جائے گا۔
