لاہور( پاک ترک نیوز) لاہور میں عمرہ زائرین کے لیے ویکسینیشن کا عمل مشکلات کا شکار ہوگیا۔ عمرہ ادائیگی کے لیے جانے والے مسافروں کے لیے پولیو، گردن توڑ بخار اور انفلوئنزا کی ویکسینیشن لازمی قرار دی گئی ہے۔لاہور میں پولیو ویکسینیشن کی سہولت صرف گورنمنٹ مزنگ ہسپتال میں دستیاب ہے، جس کے باعث ایک ہی مرکز پر زائرین کا رش بڑھ گیا ہے۔ ہسپتال میں عملے کی کمی اور زائرین کی زیادہ تعداد کے باعث ویکسین لگوانے والوں کو مشکلات کا سامنا ہے۔
پنجاب کے دیگر اضلاع میں بھی پولیو ویکسینیشن کی سہولت کی بندش کے باعث شہری لاہور کا رخ کرنے پر مجبور ہیں۔ دیگر اضلاع سے آنے والے زائرین بھی مزنگ ہسپتال میں ویکسینیشن کے لیے پہنچ رہے ہیں، جس سے مرکز پر مزید دباؤ بڑھ گیا ہے۔محکمہ صحت پنجاب کے مطابق گردن توڑ بخار اور انفلوئنزا کی ویکسینیشن سرکاری سطح پر کسی مرکز سے نہیں کی جا رہی۔ دونوں ویکسینیں لاہور ہوائی اڈے پر لگائی جائیں گی۔
یہ بھی پڑھیں: پاکستان کی سعودی عرب میں تیل کی پائپ لائن پر ڈرون حملوں کی شدید مذمت
محکمہ صحت پنجاب کا کہنا ہے کہ گردن توڑ بخار اور انفلوئنزا کی ویکسینیشن ہوائی اڈے پر سول ایوی ایشن کے شعبہ صحت کی جانب سے کی جائے گی۔عمرہ زائرین کا کہنا ہے کہ ویکسینیشن کے لیے محدود مراکز اور عملے کی کمی کے باعث انہیں وقت اور سفری مشکلات کا سامنا کرنا پڑ رہا ہے۔
