اسلام آباد ( پاک ترک نیوز) پٹرولیم مصنوعات کی قیمتوں میں مسلسل پانچویں روز اضافے نے عوام کی مشکلات مزید بڑھا دی ہیں۔ پٹرول کی قیمت میں مزید 5 روپے 2 پیسے فی لیٹر اضافہ کردیا گیا، جس کے بعد نئی قیمت 375 روپے 82 پیسے فی لیٹر مقرر ہوگئی۔
ڈیزل بھی عوام کی جیب پر بھاری پڑ گیا، ڈیزل کی قیمت میں 5 روپے 28 پیسے فی لیٹر اضافہ کیا گیا ہے، جس کے بعد ڈیزل کی نئی قیمت 403 روپے 32 پیسے فی لیٹر ہوگئی۔پانچ روز کے دوران پٹرول کی قیمت میں مجموعی طور پر 29 روپے 90 پیسے جبکہ ڈیزل کی قیمت میں 25 روپے 27 پیسے فی لیٹر اضافہ ہوچکا ہے۔پٹرولیم مصنوعات کی قیمتوں میں مسلسل اضافے پر شہریوں نے شدید ردعمل کا اظہار کیا ہے۔ عوام کا کہنا ہے کہ پٹرول اور ڈیزل کی قیمتیں بڑھنے سے پہلے ہی مہنگائی کا شکار عوام کی مشکلات میں مزید اضافہ ہوگیا ہے۔
یہ بھی پڑھیں: عالمی منڈی میں خام تیل کی قیمت میں بڑا ضافہ
شہریوں کا کہنا ہے کہ پٹرول مہنگا ہونے کا براہ راست اثر روزمرہ استعمال کی ہر چیز پر پڑتا ہے، کیونکہ ٹرانسپورٹ کے کرائے بڑھتے ہیں اور اشیائے خورونوش سمیت دیگر ضروری سامان کی قیمتیں بھی اوپر چلی جاتی ہیں۔عوام نے سوال اٹھایا ہے کہ آخر پٹرولیم مصنوعات کی قیمتوں میں مسلسل اضافہ کب رکے گا؟ حکومت عوام کو ریلیف دینے کے بجائے ہر چند روز بعد نیا بوجھ ڈال رہی ہے۔شہریوں کا کہنا ہے کہ تنخواہیں اور آمدن وہیں کی وہیں ہیں، لیکن پٹرول، ڈیزل، بجلی اور اشیائے ضروریہ کی قیمتیں مسلسل بڑھ رہی ہیں، جس سے عام آدمی کے لیے گھر کا بجٹ چلانا بھی مشکل ہوگیا ہے۔عوام نے حکومت سے مطالبہ کیا ہے کہ پٹرولیم مصنوعات کی قیمتوں میں اضافے کا سلسلہ روکا جائے اور عوام کو فوری ریلیف فراہم کیا جائے۔
