ٹرینڈا ٹوبیگو ( پاک ترک نیوز) قومی ٹیم کی بیٹنگ ایک بار پھر بری طرح ناکام ہو گئی ، پہلے ٹیسٹ میں ویسٹ انڈیز نے پاکستان کو 90 رنز سے شکست دے کر سیریز میں برتری حاصل کر لی۔
211 رنز کے ہدف کے تعاقب میں پاکستان کی پوری ٹیم صرف 120 رنز پر ڈھیر ہو گئی۔ قومی بیٹنگ لائن ابتدا ہی سے مشکلات کا شکار رہی اور صرف 50 رنز پر آدھی ٹیم پویلین لوٹ چکی تھی۔
کپتان بابر اعظم نے مزاحمت کرتے ہوئے 58 رنز کی اننگز کھیلی اور پاکستان کی جانب سے ٹاپ اسکورر رہے، تاہم انہیں دوسرے اینڈ سے کوئی خاطر خواہ ساتھ نہ مل سکا۔ قومی ٹیم کے 8 بیٹرز ڈبل فگر میں بھی داخل نہ ہو سکے، جس کے باعث شکست پاکستان کا مقدر بنی۔
اس سے قبل ویسٹ انڈیز نے اپنی دوسری اننگز میں 181 رنز بنائے۔ میزبان ٹیم کی جانب سے شمار جوزف 38 رنز کے ساتھ نمایاں بلے باز رہے، جس کی بدولت ویسٹ انڈیز نے پاکستان کو جیت کے لیے 211 رنز کا ہدف دیا۔
یہ بھی پڑھیں: پہلا ٹیسٹ : پاکستانی ٹیم پر یقینی شکست کے سائے منڈلانے لگے
بیٹنگ لائن کی مسلسل ناکامی نے ایک بار پھر قومی ٹیم کی کارکردگی پر سوالات کھڑے کر دیے ہیں۔ نئے کپتان کی قیادت میں بھی پاکستان شکست سے نہ بچ سکا، جبکہ اب سیریز میں واپسی کے لیے دوسرے ٹیسٹ میں ہر شعبے میں غیر معمولی کھیل کا مظاہرہ کرنا ہوگا۔
