موغادیشو ( پاک ترک نیوز) صومالیہ کی میری ٹائم پولیس نے قزاقوں کے قبضے سے آئل ٹینکر ’’آنر 25‘‘ کو بازیاب کرا لیا، کارروائی کے دوران قزاقوں کی فائرنگ سے تین پاکستانی، ایک بھارتی اور ایک میانمار کا شہری ہلاک ہوگیا۔انصار برنی ٹرسٹ کے مطابق قزاقوں کی فائرنگ سے چار پاکستانی شہری زخمی بھی ہوئے۔صومالی حکام کے مطابق آئل ٹینکر کے عملے کے پانچ ارکان قزاقوں کے ہاتھوں قتل ہوئے، جبکہ سکیورٹی فورسز نے کارروائی کے دوران نو قزاقوں کو گرفتار کرلیا۔صومالی میری ٹائم پولیس کے مطابق بحری اور زمینی دستوں نے نیم خودمختار علاقے پنٹ لینڈ کے ضلع بندر بیلا کے علاقے دھرین بار میں کارروائی کی، جس کے دوران جہاز پر موجود عملے کے سترہ ارکان کو بحفاظت بازیاب کرالیا گیا۔
یہ بھی پڑھیں: وزیراعلیٰ خیبر پختونخوا کا 4 اکتوبر کو لانگ مارچ کا اعلان
پالو کے پرچم بردار آئل ٹینکر ’’آنر 25‘‘ کو رواں برس اپریل میں ہائی جیک کیا گیا تھا۔ صومالی حکام کے مطابق ہائی جیکنگ کے وقت جہاز پر اٹھارہ ہزار پانچ سو بیرل تیل لدا ہوا تھا۔آئل ٹینکر کے عملے میں دس پاکستانی شہری بھی شامل تھے۔
