اسلام آباد(پاک ترک نیوز ) بانی پی ٹی آئی اور بشریٰ بی بی سے جیل میں ملاقات کے بعد اہم پیش رفت سامنے آگئی، بشریٰ بی بی نے علاج اور آنکھوں کے ممکنہ آپریشن کے لیے اسپتال منتقلی کی درخواست اسلام آباد ہائی کورٹ میں دائر کر دی۔بشریٰ بی بی نے اپنے وکلا لطیف کھوسہ اور بیرسٹر سلمان صفدر کے ذریعے عدالت سے رجوع کیا ہے۔ درخواست میں استدعا کی گئی ہے کہ ان کا مکمل طبی ریکارڈ عدالت میں پیش کرنے کا حکم دیا جائے، طبی معائنے اور سرجری کے لیے تمام ضروری سہولتیں فراہم کی جائیں اور بہتر نگہداشت و علاج کے لیے انہیں فوری طور پر کسی مستند خصوصی اسپتال منتقل کیا جائے۔
درخواست کے مطابق 10 نومبر کو ہونے والی ملاقات میں بانی پی ٹی آئی نے بشریٰ بی بی کی صحت کی سنگینی سے آگاہ کیا، جبکہ بشریٰ بی بی نے 15 نومبر کو ممکنہ آنکھوں کے آپریشن کے بارے میں بتایا تھا۔درخواست گزار کا مؤقف ہے کہ بشریٰ بی بی کو آنکھوں میں تکلیف اور دیکھنے میں شدید دشواری کا سامنا ہے۔ شکایت کے سات سے آٹھ روز بعد جیل میں ڈاکٹر نے معائنہ کیا اور انہیں بتایا گیا کہ آنکھوں کی اہم سرجری درکار ہے، جس کے نتیجے میں بینائی متاثر ہونے کا خدشہ بھی ظاہر کیا گیا۔عدالت میں جمع کرائی گئی درخواست کے مطابق بشریٰ بی بی کی دونوں آنکھوں میں موتیے کی تشخیص ہوئی ہے اور جیل حکام کے مطابق ان کا آپریشن 15 نومبر 2026 کو متوقع تھا۔درخواست میں دعویٰ کیا گیا ہے کہ بشریٰ بی بی کی بینائی اس حد تک متاثر ہو چکی ہے کہ وہ عینک کے بغیر دیکھنے سے قاصر ہیں، جبکہ عینک لگانے کے باوجود سامنے بیٹھے افراد کو صرف سیاہ شکل کے طور پر دیکھ پاتی ہیں۔
یہ بھی پڑھیں: مجھے برین ہیمرج اور دل کے دورے کا خطرہ ہے، زندہ رہوں گا تو بے گناہی ثابت کروں گا: بانی پی ٹی آئی کا چیف جسٹس صاحبان کو خط
درخواست گزار کے مطابق آنکھوں میں شدید درد کے باعث بشریٰ بی بی روزانہ درد دور کرنے والی دوائیں استعمال کر رہی ہیں۔ جیل میں صفائی کی ناقص صورتِ حال، حشرات اور کاکروچ کی موجودگی بھی ان کی صحت کے لیے خطرہ قرار دی گئی ہے۔درخواست میں یہ دعویٰ بھی کیا گیا ہے کہ ماضی میں ان کے کمرے سے سات چھوٹے سانپ نکلے تھے، جس کے بعد متعلقہ حصوں کو سیمنٹ سے بند کیا گیا۔ مزید کہا گیا ہے کہ جیل میں دستیاب ڈاکٹر آنکھوں کے امراض کے ماہر نہیں، جبکہ صفائی کے ناقص انتظامات اور انفیکشن کے خدشے کے باعث آپریشن کے بعد بینائی مستقل طور پر متاثر ہونے کا خطرہ ہے۔
درخواست کے ساتھ 11 نومبر 2026 کو اڈیالہ جیل میں ہونے والی ملاقات کی تفصیلی رپورٹ بھی عدالت میں جمع کرائی گئی ہے۔












