اسلام آباد ( پاک ترک نیوز) پاکستان اور دنیا بھر میں مقیم کشمیری آج 27 اکتوبر کو یومِ سیاہ منا رہے ہیں۔ 1947 میں آج ہی کے دن بھارتی فوج سری نگر میں اتری تھی، جسے پاکستان اور کشمیری قیادت مقبوضہ جموں و کشمیر پر بھارتی تسلط کے آغاز کے طور پر یاد کرتے ہیں۔یومِ سیاہ کے موقع پر مقبوضہ کشمیر میں مکمل ہڑتال کی گئی ہے، جبکہ اسلام آباد میں ریلی کا انعقاد کیا گیا، جس میں بڑی تعداد میں لوگوں نے شرکت کی۔مظفرآباد میں شاہراہِ سری نگر پر کنٹرول لائن کی جانب مارچ کیا جائے گا۔ شرکا ضلع جہلم ویلی کے علاقے ہٹیاں بالا میں بھارت کے خلاف احتجاج کریں گے۔
وزیراعظم آزاد کشمیر افتخار گیلانی نے یومِ سیاہ پر اپنے پیغام میں کہا کہ 27 اکتوبر 1947 ریاست جموں و کشمیر کی تاریخ کا سیاہ ترین دن ہے۔ ان کا کہنا تھا کہ بھارتی مظالم کے باوجود کشمیریوں کے دلوں میں آزادی کی شمع روشن ہے اور جذبۂ آزادی نسل در نسل منتقل ہو رہا ہے۔انہوں نے اس امید کا اظہار کیا کہ کشمیری عوام اپنی جدوجہد میں کامیاب ہوں گے اور ریاست جموں و کشمیر اپنے مستقبل کا فیصلہ کرے گی۔دوسری جانب پاکستان اور آزاد کشمیر میں یومِ سیاہ کے موقع پر مقبوضہ کشمیر کے عوام کے ساتھ بھرپور اظہارِ یکجہتی کیا جا رہا ہے۔ کشمیری قیادت اور عوام نے مقبوضہ وادی پر بھارتی تسلط کو جابرانہ قرار دیتے ہوئے اقوام متحدہ کی قراردادوں کے مطابق کشمیریوں کو حقِ خودارادیت دینے کا مطالبہ کیا ہے۔
یہ بھی پڑھیں: کال سینٹرز کے خلاف کارروائیاں، 646 ملزمان گرفتار، این سی سی آئی اے کی رپورٹ تیار
پاکستان کی جانب سے کشمیری عوام کی آزادی اور حقِ خودارادیت کی جدوجہد کے لیے اخلاقی، سفارتی اور سیاسی حمایت جاری رکھنے کے عزم کا اعادہ بھی کیا گیا ہے۔
