اسلام آباد( پاک ترک نیوز) نائب وزیراعظم اور وزیر خارجہ اسحاق ڈار نے کہا ہے کہ ’’کشمیر بنے گا پاکستان‘‘ ہر کشمیری اور ہر پاکستانی کے دل کی آواز ہے، پاکستان نے ہر عالمی فورم پر مسئلہ کشمیر بھرپور انداز میں اٹھایا ہے اور دنیا مسئلہ کشمیر کو نہیں بھولی۔اسلام آباد میں یومِ سیاہ کشمیر کی تقریب سے خطاب کرتے ہوئے اسحاق ڈار نے کہا کہ کشمیری عوام سے ان کا حقِ خودارادیت کوئی نہیں چھین سکتا۔ آٹھ دہائیاں گزرنے کے باوجود مسئلہ کشمیر حل طلب ہے۔نائب وزیراعظم نے کہا کہ 27 اکتوبر 1947 کو بھارت نے کشمیر پر قبضے کا قدم اٹھایا، جبکہ 5 اگست 2019 کو یکطرفہ اقدامات کے ذریعے مسئلہ کشمیر کو مزید پیچیدہ بنا دیا گیا۔
یہ بھی پڑھیں: 27اکتوبر ،پاکستان اوردنیا بھر میں مقیم کشمیریوں کا یوم سیاہ
اسحاق ڈار کے مطابق بھارت مقبوضہ کشمیر میں آبادی کا تناسب تبدیل کرنے کے ایجنڈے پر عمل پیرا ہے، جبکہ وہاں لوگوں کو مذہبی عبادات کی ادائیگی سے بھی روکا جا رہا ہے۔انہوں نے کہا کہ کشمیری عوام کی جدوجہد انصاف، امن اور حقِ خودارادیت کے لیے ہے۔ ان کی امنگوں کو طاقت اور جبر کے ذریعے دبایا نہیں جا سکتا۔نائب وزیراعظم نے اس عزم کا اعادہ کیا کہ پاکستان کشمیری عوام کی سیاسی، اخلاقی اور سفارتی حمایت جاری رکھے گا اور عالمی برادری کے سامنے مسئلہ کشمیر کے منصفانہ حل کا مطالبہ کرتا رہے گا۔
