کراچی ( پاک ترک نیوز) کراچی کے نوجوان میر رضا کیس کی تحقیقات میں اہم پیش رفت، پوسٹ مارٹم اور طبی شواہد کے دوران معدے میں تیزاب کی موجودگی کے شواہد سامنے آگئے۔ ذرائع کے مطابق تیزاب سے میر رضا کے پھیپھڑے بھی شدید متاثر ہوئے، جبکہ شرٹ پر تیزاب اور مبینہ طور پر کسی دوسرے شخص کے پسینے کے نشانات بھی ملے ہیں۔
کراچی کے نوجوان میر رضا کیس کی تحقیقات میں نیا موڑ آگیا، طبی شواہد میں میر رضا کے معدے سے تیزاب کی موجودگی کے شواہد ملنے کا انکشاف ہوا ہے۔
ذرائع کے مطابق میر رضا کے پھیپھڑے بھی تیزاب کے باعث شدید متاثر ہوئے، جبکہ ہاتھوں اور پیروں پر بھی تیزاب کے اثرات پائے گئے ہیں۔
تحقیقاتی ذرائع کے مطابق میر رضا کی شرٹ پر بھی تیزاب کے نشانات ملے ہیں، جبکہ شرٹ پر مبینہ طور پر کسی دوسرے شخص کے پسینے کے نشانات بھی موجود ہیں۔
یہ بھی پڑھیں: میر رضا کیس میں نئے سوالات، ورثا کا شفاف تحقیقات کا مطالبہ
پولیس کو شرٹ کی فرانزک رپورٹ کا انتظار ہے، جس کے بعد تحقیقات میں مزید پیش رفت متوقع ہے۔
تحقیقات کا دائرہ وسیع کرتے ہوئے پولیس نے جائے وقوعہ کے قریب ایک مشکوک گیسٹ ہاؤس کو سیل کردیا ہے۔پولیس نے گیسٹ ہاؤس کے 6 ملازمین کو بھی حراست میں لے لیا ہے اور ان سے مختلف پہلوؤں پر تفتیش کی جارہی ہے۔
ذرائع کے مطابق میر رضا کیس میں اب تک مجموعی طور پر 21 افراد کو حراست میں لے کر پوچھ گچھ کی جاچکی ہے۔زیر حراست افراد میں میر رضا کے دوستوں کے علاوہ اس کے کاروباری شراکت دار بھی شامل ہیں۔پولیس کے مطابق تمام زیر حراست افراد کے بیانات ریکارڈ کیے جاچکے ہیں، جبکہ تفتیش مختلف پہلوؤں سے جاری ہے۔
