نیو یارک ( پاک ترک نیوز) امریکہ اور ایران کی جنگ کے عالمی معیشت پر بھاری منفی اثرات پڑ رہے ہیں ۔ مشرق وسطی کی صورتحال کے باعث کئی ممالک میں مہنگائی کے طوفان کا خدشہ ہے وہیں اقوام متحدہ نے خبردار کیا ہے کہ ایران امریکہ جنگ کے باعث عرب ممالک میں 37لاکھ ملازمتیں ختم ہونے کا امکان ہے ۔عرب ممالک جنگ کے ایک ماہ کے دوران 186
ارب کا بھاری نقصان بھی ہوا ہے جو ان کی جی ڈی پی کا تقریباً 6فیصد ہے ۔
امریکہ اور اسرائیل کی جارحیت کے باعث مشرق وسطی جنگ کی لپیٹ میں ہے ۔ آبنائے ہرمز کے باعث سامان کی ترسیل رکی ہوئی ہے اور دنیا بھر میں تیل کا بحران سر اٹھانے لگا ہے وہیں ایک اور بری خبر بھی سامنے آ ئی ہے کہ عرب ممالک میں ملازمتوں ختم ہونے کا امکان بڑھ گیا ہے ۔
اقوام متحدہ کی اس رپورٹ نے عرب ممالک میں بیرون ملک سے کام کی غرض سے آنے والے افراد کی مشکلات میں مزید اضافہ کردیا ہے ۔ اپنے گھر والوں کا پیٹ پالنے اور اچھے مستقبل کی خواہش کی امید لئے عرب ممالک میں رہنے والے اور مستقبل میں وہاں روزگار کیلئے جانے والے افراد کو شدید مایوسی کا سامنا ہے ۔
اقوام متحدہ کا کہنا ہے کہ ایران اور امریکہ کی جنگ جیسے جیسے طوالت اختیار کرتی جا رہی ہے اس سے نہ صرف بیروزگاری کی شرح میں اضافہ ہوگا بلکہ بڑے پیمانے پر ملازمتیں بھی ختم ہو جائیں گی ۔
یو این کی رپورٹ میں کہا گیا ہےکہ مشرق وسطی کشیدگی کے باعث ایک ماہ میں عرب ممالک کو 186ارب کا بھاری نقصان بھی برداشت کرنا پڑا ہے ۔ اسی ایک ماہ کے دوران 40لاکھ سے زائد افراد غربت کی لکیر سے نیچے جا چکے ہیں ۔
