اسلام آباد ( پاک ترک نیوز) صدر مملکت آصف علی زرداری سے ملائیشیا کے وزیر داخلہ سیف الدین نصوتیون بن اسماعیل نے ایوانِ صدر میں ملاقات کی، جس میں پاکستان اور ملائیشیا کے درمیان سکیورٹی، قانون نافذ کرنے، تجارت اور ادارہ جاتی تعاون مزید مضبوط بنانے پر تبادلۂ خیال کیا گیا۔
صدر مملکت نے قانون نافذ کرنے والے اداروں اور سکیورٹی کے شعبوں میں دونوں ممالک کے تعاون کو مزید وسعت دینے پر زور دیا۔ ملاقات میں انسدادِ دہشت گردی، منشیات کی روک تھام اور انسانی اسمگلنگ کے خلاف مشترکہ تعاون بڑھانے پر اتفاق کیا گیا۔
صدر آصف علی زرداری نے کہا کہ پاکستان اور ملائیشیا کے برادرانہ تعلقات مشترکہ مذہب، ثقافت اور باہمی احترام پر مبنی ہیں۔ انہوں نے داخلی سلامتی، امیگریشن اور قانونی و عدالتی امور میں ادارہ جاتی تعاون میں پیش رفت کو سراہا۔
صدر مملکت کا کہنا تھا کہ متعلقہ اداروں کے درمیان مسلسل رابطے اور تعاون سے دونوں ممالک کے شہریوں کو مزید سہولت ملے گی۔ملاقات میں پاکستان اور ملائیشیا کے درمیان دوطرفہ تجارت کے فروغ پر بھی بات چیت ہوئی۔ صدر زرداری نے ملائیشیا میں پاکستانی مصنوعات کے لیے مزید مارکیٹ تک رسائی پر زور دیا۔
صدر مملکت کے مطابق ملائیشیا میں پاکستانی چاول، آلو، گندم، پولٹری اور جانوروں کی خوراک کی طلب موجود ہے، جس سے دوطرفہ تجارت بڑھانے کے مزید مواقع پیدا کیے جا سکتے ہیں۔ملائیشین وزیر داخلہ نے کہا کہ 2026ء پاکستان اور ملائیشیا کے سفارتی تعلقات کے قیام کا 69واں سال ہے۔ انہوں نے بتایا کہ دونوں ممالک کے درمیان ہفتہ وار 14 پروازیں چل رہی ہیں جبکہ پروازوں میں اضافے کی کوششیں بھی جاری ہیں۔
یہ بھی پڑھیں: ملائیشیا کے وزیر داخلہ کا پاکستان مونومنٹ اور اسلام آباد پولیس لائنز کا دورہ
ملاقات میں ملائیشین وزیر داخلہ کے دورے کو دونوں ممالک کے دوطرفہ تعلقات اور ادارہ جاتی روابط مزید مضبوط بنانے کے لیے اہم قرار دیا گیا۔ وفاقی وزیر داخلہ سید محسن رضا نقوی بھی ملاقات میں موجود تھے۔
