اسلام آباد ( پاک ترک نیوز) ملائیشیا کے وزیر داخلہ سیف الدین ناسوتیون بن اسماعیل نے وزیر مملکت برائے داخلہ طلال چوہدری کے ہمراہ پاکستان مونومنٹ اور اسلام آباد پولیس لائنز کا دورہ کیا۔ پاکستان مونومنٹ پہنچنے پر فیڈرل کانسٹیبلری کے چاق و چوبند دستے نے معزز مہمان کو شاندار سلامی پیش کی، جبکہ اسلام آباد پولیس لائنز میں ان کے اعزاز میں خصوصی پریڈ بھی منعقد کی گئی۔
ملائیشیا کے وزیر داخلہ سیف الدین ناسوتیون بن اسماعیل وزیر مملکت برائے داخلہ طلال چوہدری کے ہمراہ پاکستان مونومنٹ پہنچے۔پاکستان مونومنٹ آمد پر فیڈرل کانسٹیبلری کے چاق و چوبند دستے نے ملائیشیا کے وزیر داخلہ کو شاندار سلامی پیش کی۔
ملائیشین وزیر داخلہ نے پاکستان مونومنٹ میں یادگار شہداء پر حاضری دی۔انہوں نے یادگار شہداء پر پھول رکھے اور فاتحہ خوانی کی۔ملائیشیا کے وزیر داخلہ نے شہداء کی عظیم قربانیوں کو خراج تحسین پیش کیا اور یادگار شہداء پر احترام کا اظہار کیا۔
اس موقع پر انہیں پاکستان مونومنٹ کی تاریخی اہمیت اور اس کی تعمیر کے حوالے سے تفصیلی بریفنگ بھی دی گئی ۔ملائیشین وزیر داخلہ نے پاکستان مونومنٹ اور یادگار شہداء کی تاریخی و قومی اہمیت کو سراہا۔بعد ازاں ملائیشیا کے وزیر داخلہ نے اسلام آباد پولیس لائنز کا دورہ کیا، جہاں ان کے اعزاز میں شاندار پریڈ کا انعقاد کیا گیا۔ اسلام آباد پولیس کے خصوصی دستے نے معزز مہمان کو سلامی پیش کی۔پریڈ کے موقع پر پاکستان اور ملائیشیا کے قومی ترانے بھی بجائے گئے۔ملائیشیا کے وزیر داخلہ نے اسلام آباد پولیس کے دستوں کی پریڈ کا معائنہ کیا۔انہوں نے پولیس اہلکاروں کی پیشہ ورانہ مہارت، نظم و ضبط اور شاندار کارکردگی کو سراہا۔
یہ بھی پڑھیں: حکومت لیوی ختم کرے ورنہ احتجاج کا دائرہ وسیع کریں گے: حافظ نعیم
ملائیشیا کے وزیر داخلہ نے نمایاں کارکردگی کا مظاہرہ کرنے والے اسلام آباد پولیس کے اہلکاروں میں انعامات بھی تقسیم کیے ۔ملائیشیا کے وزیر داخلہ نے پاکستان میں قانون نافذ کرنے والے اداروں کی پیشہ ورانہ صلاحیتوں اور خدمات کو سراہا۔تقریب میں آئی جی فیڈرل کانسٹیبلری ریاض نذیر گاڑا، آئی جی اسلام آباد پولیس علی ناصر رضوی، ڈی آئی جی اسلام آباد اور دیگر اعلیٰ حکام بھی موجود تھے۔
