اسلام آباد ( پاک ترک نیوز) وزیرخزانہ محمد اورنگزیب نے کہا ہے کہ ٹیکس نظام کو سہل اور مؤثر بنانا حکومت کی ترجیح ہے، کوئی طبقہ ٹیکس کے دھارے میں شامل نہ ہو تو ٹیکس نظام مؤثر انداز میں نہیں چل سکتا۔
اسلام آباد میں ریٹیلر اسکیم ایپ کے اجرا کی تقریب سے خطاب کرتے ہوئے وزیرخزانہ محمد اورنگزیب نے کہا کہ ٹیکس نظام ملکی معیشت میں اہم کردار ادا کرتا ہے، ریٹیلر اسکیم کے ذریعے چھوٹے دکانداروں کو سہولت فراہم کی جائے گی۔
وزیرمملکت بلال اظہر کیانی نے کہا کہ ٹیکس کا دائرہ وسیع کرنے کے لیے اقدامات کیے جارہے ہیں، ریٹیلر اسکیم تاجروں کی مشاورت سے تیار کی گئی ہے اور ایپ کا باقاعدہ اجرا آج سے کردیا گیا ہے۔
یہ بھی پڑھیں: نواز شریف کو لاہور کی خوبصورتی اور ترقیاتی منصوبوں پر اہم بریفنگ
انہوں نے بتایا کہ ریٹیلر اسکیم ایپ ان دکانداروں کے لیے بھی ہے جو ابھی تک ٹیکس نیٹ میں شامل نہیں، ایپ کے ذریعے دکاندار آسانی سے فائلر بن سکیں گے۔بلال اظہر کیانی کے مطابق ریٹیلر اسکیم ایپ گوگل پلے اسٹور سے ڈاؤن لوڈ کی جاسکے گی، جبکہ ستمبر کے پہلے ہفتے تک ایپ مقامی زبانوں میں بھی دستیاب ہوگی۔چیئرمین ایف بی آر راشد لنگڑیال نے کہا کہ ریٹیلر اسکیم تاجروں کی آسانی کے لیے متعارف کرائی گئی ہے، پہلے فائلر بننے کے لیے کنسلٹنٹ سے رابطہ کرنا پڑتا تھا، تاہم اب ٹیکس نیٹ میں شمولیت کے لیے تاجروں کو آسان طریقہ فراہم کردیا گیا ہے۔
انہوں نے امید ظاہر کی کہ ریٹیلر اسکیم کامیاب ہوگی اور تاجروں کے تعاون سے اسے مزید مؤثر بنایا جائے گا۔
