لاہور( پاک ترک نیوز) لاہور میں زیرِ زمین پانی کی سطح مسلسل خطرناک حد تک نیچے جا رہی ہے، جس پر ماہرین نے خبردار کیا ہے کہ اگر فوری اقدامات نہ کیے گئے تو مستقبل میں شہر کو پانی کے شدید بحران کا سامنا کرنا پڑ سکتا ہے۔
ماہرین کے مطابق ہر سال مون سون کے دوران کروڑوں گیلن بارش کا پانی نکاسی آب کے نظام اور دریاؤں میں بہہ کر ضائع ہو جاتا ہے، جبکہ اسی پانی کو زیرِ زمین ذخائر بھرنے کے لیے استعمال کیا جا سکتا ہے۔
پنجاب یونیورسٹی کے آبی وسائل کے ماہر ڈاکٹر محمد یٰسین کے مطابق لاہور میں زیرِ زمین پانی کی سطح ہر سال تقریباً ایک سے ڈیڑھ میٹر تک نیچے جا رہی ہے۔
ڈاکٹر محمد یاسین کے مطابق پانی کی کمی کی وجہ شہر کی تیزی سے بڑھتی ہوئی آبادی،پانی کی بڑھتی ہوئی طلب،ٹیوب ویلوں کے ذریعے بے دریغ پانی نکالنا۔دریاؤں اور نہروں میں پانی کے بہاؤ میں کمی ہے
یہ بھی پڑھیں: والڈ سٹی آف لاہور اتھارٹی کا مارکیٹوں میں فائر سیفٹی سسٹم نصب کرنے کاحکم
انہوں نے کہا کنکریٹ سے ڈھکی سڑکیں اور عمارتیں، جن کی وجہ سے بارش کا پانی زمین میں جذب نہیں ہو پاتا
ڈاکٹر محمد یٰسین کے مطابق بارش کے پانی کو ضائع ہونے سے بچانے کے لیے ری چارج ویلز ،ری جارج پٹس ،بائیو سویلینز ،فلٹریشن سسٹمزقائم کیے جا سکتے ہیں، جن کے ذریعے بارش کا پانی صاف کرکے دوبارہ زیرِ زمین آبی ذخائر میں پہنچایا جاتا ہے۔
ان کا کہنا ہے کہ اس سے نہ صرف زیرِ زمین پانی میں اضافہ ہوگا بلکہ مون سون کے دوران شہری علاقوں میں پانی جمع ہونے اور سیلابی صورتحال میں بھی کمی آئے گی۔
پنجاب یونیورسٹی کا کامیاب منصوبہ
ڈاکٹر یٰسین نے بتایا کہ پنجاب یونیورسٹی نے ڈبلیو ڈبلیو ایف اور پاکستان کے تعاون سے بارش کے پانی کو محفوظ کرنے اور زیرِ زمین پہنچانے کا نظام نصب کیا ہے۔
اس منصوبے کے تحت عمارتوں کی چھتوں اور کھلے مقامات سے بارش کا پانی جمع کیا جاتا ہے۔پانی کو فلٹر کیا جاتا ہے۔پھر اسے ری چارج سسٹم کے ذریعے زمین کے اندر پہنچایا جاتا ہے تاکہ قدرتی آبی ذخائر دوبارہ بھر سکیں۔
راوی اربن ڈویلپمنٹ اتھارٹی کے ڈائریکٹر ر ماحولیات عابد لطیف سندھو کے مطابق مسلسل پانی نکالنے سے پہلے سطح کے قریب موجود آبی ذخائر ختم ہوتے ہیں، جس کے بعد مزید گہرائی میں موجود قدیم پانی استعمال کرنا پڑتا ہے۔
انہوں نے بتایا کہ یہ پانی ہزاروں بلکہ بعض صورتوں میں لاکھوں برس پرانا ہوتا ہے، اور اگر یہ ختم ہو گیا تو انسانی زندگی کے دوران دوبارہ نہیں بھر سکے گا۔
ماہرین کے مطابق لاہور کے زیرِ زمین پانی کو صرف کمی ہی نہیں بلکہ آلودگی کا بھی خطرہ لاحق ہے۔صنتی فضلہ ،سیوریج کا پانی ،زرعی ادویات اور کیمیکل جیسی دھاتیں آلوگی کی بڑی وجہ ہیں
ان کا کہنا ہے کہ صاف پانی نکالا جا رہا ہے جبکہ آلودہ پانی آہستہ آہستہ زیرِ زمین ذخائر میں شامل ہو رہا ہے، جو مستقبل میں پینے کے صاف پانی کی فراہمی کے لیے بڑا خطرہ بن سکتا ہے۔
ماہرین نے حکومت کو تجویز دی ہے کہ تمام نئی ہاؤسنگ سوسائٹیوں میں بارش کا پانی محفوظ کرنے کے ری چارج ویلز لازمی قرار دیے جائیں۔ہر محلے میں کمیونٹی ری چارج ویلز بنائے جائیں۔ گہرے آبی ذخائر سے پانی نکالنے پر سخت قوانین نافذ کیے جائیں۔
گلیشیئرز سے لے کر گھروں تک پانی کے پورے نظام پر مشتمل جامع واٹر پالیسی بنائی جائے، جس میں زرعی، صنعتی اور گھریلو استعمال کے لیے واضح حکمت عملی اور مؤثر عملدرآمد شامل ہو۔
لاہور واٹر اینڈ سینی ٹیشن ایجنسی واس کے مطابق شہر میں زیرِ زمین پانی بڑھانے کے منصوبوں پر کام شروع کر دیا گیا ہے۔ فی الحال جدید ری چارج ویلز ،لبرٹی چوک ،مراتب علی روڈ ،گلبرگ کے پارک میں نصب ہیں ۔واسا کے مطابق ہر ری چارج ویل روزانہ تقریباً 8 ہزار گیلن بارش کا پانی صاف کرکے زیرِ زمین ذخائر میں منتقل کرنے کی صلاحیت رکھتا ہے۔
پہلے مرحلے میں لاہور میں مزید 15 ری چارج ویلز تعمیر کیے جائیں گے، جبکہ طویل المدتی منصوبے کے تحت شہر بھر میں 1,000 ری چارج ویلز قائم کرنے کا ہدف مقرر کیا گیا ہے۔
ماہرین کا کہنا ہے کہ اگر لاہور میں بارش کے پانی کو محفوظ کرنے، زیرِ زمین پانی کے بے دریغ استعمال کو روکنے اور آلودگی پر قابو پانے کے لیے فوری اور مؤثر اقدامات نہ کیے گئے تو آنے والے برسوں میں شہر کو پانی کی شدید قلت اور محفوظ پینے کے پانی کے بحران کا سامنا کرنا پڑ سکتا ہے۔ بارش کے پانی کو ضائع ہونے سے بچانا اور اسے دوبارہ زمین میں جذب کرنا مستقبل میں پانی کی دستیابی یقینی بنانے کے لیے ناگزیر قرار دیا جا رہا ہے۔
