لاہور( پاک ترک نیوز) رات بھر جاگنا، موبائل اسکرین پر نظریں جمائے رکھنا، کام اور مصروفیات میں نیند قربان کرنا۔۔۔ اگر یہ آپ کی روزمرہ زندگی کا حصہ بن چکا ہے تو خبردار۔۔۔ ماہرین کے مطابق صرف چند گھنٹوں کی کم نیند آپ کے جسم میں خاموشی سے ایسی تباہی مچا سکتی ہے جس کے اثرات برسوں تک ساتھ رہ سکتے ہیں۔
نیند صرف آرام کا نام نہیں بلکہ جسم کی مرمت، دماغ کی بحالی اور بیماریوں سے تحفظ کا قدرتی نظام ہے۔ لیکن جب نیند چھ گھنٹے سے کم ہو جائے تو جسم خطرے کی گھنٹی بجانا شروع کر دیتا ہے۔
ماہرین کے مطابق نیند کی کمی سب سے پہلے وزن پر حملہ کرتی ہے۔ کم سونے والے افراد کو زیادہ بھوک لگتی ہے اور وہ معمول سے زیادہ کھانا کھاتے ہیں۔ اس کی وجہ بھوک بڑھانے والے ہارمون "گھریلین” میں اضافہ اور بھوک کو کنٹرول کرنے والے ہارمون "لیپٹین” میں کمی ہے۔
صرف یہی نہیں، ناکافی نیند ذیابیطس کے خطرات بھی بڑھا دیتی ہے۔ تحقیق کے مطابق جب جسم کو مناسب آرام نہیں ملتا تو خون میں شوگر کو استعمال کرنے کی صلاحیت متاثر ہوتی ہے، جس سے ٹائپ ٹو ذیابیطس کا امکان بڑھ جاتا ہے۔
دل کے مریضوں کے لیے بھی یہ خطرے کی گھنٹی ہے۔ ماہرین کا کہنا ہے کہ مسلسل چھ گھنٹے سے کم نیند لینے والے افراد میں دل کی بیماریوں کا خطرہ دو گنا تک بڑھ سکتا ہے۔
نیند کی کمی دل کی دھڑکن کے نظام کو متاثر کرتی ہے، بلڈ پریشر بڑھاتی ہے اور دل کو مسلسل دباؤ میں رکھتی ہے، جو بعد میں سنگین امراض کا سبب بن سکتا ہے۔
اگر آپ بار بار بیمار پڑتے ہیں تو اس کی وجہ بھی آپ کی کم نیند ہو سکتی ہے۔ ماہرین کے مطابق سوتے وقت جسم سائٹوکائنز نامی پروٹین بناتا ہے جو بیماریوں اور انفیکشن کے خلاف دفاعی نظام کو مضبوط بناتے ہیں۔
جب نیند کم ہو تو یہ حفاظتی پروٹین بھی کم بننے لگتے ہیں، نتیجتاً نزلہ، زکام اور دیگر بیماریوں کا خطرہ بڑھ جاتا ہے جبکہ صحت یابی کا عمل بھی سست پڑ جاتا ہے۔
ایک اور چونکا دینے والی حقیقت یہ ہے کہ نیند کی کمی مردانہ صحت کو بھی متاثر کر سکتی ہے۔ طبی مطالعات کے مطابق ناکافی اور غیر معیاری نیند سپرم کی تعداد میں کمی اور بانجھ پن کے خطرات بڑھا سکتی ہے۔ماہرین کہتے ہیں کہ صرف نیند کا دورانیہ ہی نہیں بلکہ اس کا معیار بھی انتہائی اہم ہے۔
اچھی نیند صحت مند زندگی کی بنیاد ہے۔ اگر کوئی شخص مسلسل کم سوتا ہے تو اس کے جسم کے تقریباً تمام اہم نظام متاثر ہو سکتے ہیں
موٹاپا، ذیابیطس، دل کے امراض، کمزور مدافعتی نظام اور حتیٰ کہ بانجھ پن۔۔۔ یہ سب صرف چند گھنٹوں کی کم نیند کی قیمت ہو سکتے ہیں۔ اس لیے اگر آپ اپنی صحت کو محفوظ رکھنا چاہتے ہیں تو آج ہی اپنی نیند کو ترجیح دیں، کیونکہ بعض اوقات صحت مند زندگی کا راز کسی دوا میں نہیں بلکہ ایک پُرسکون اور مکمل رات کی نیند میں چھپا ہوتا ہے۔
