اسلام آباد ( پاک ترک نیوز) وفاقی پولیس نے نیشنل سائبر کرائم انوسٹیگیشن ایجنسی میں نفری کی کمی کو دور کرنے کے لیے 23 افسران کو این سی سی آئی اے بھجوانے کا فیصلہ کر لیا۔ذرائع کے مطابق وفاقی پولیس نے این سی سی آئی اے بھجوائے جانے والے افسران کی فہرست بھی تیار کر لی ہے۔ کیپٹل پٹرول، انوسٹیگیشن ونگ، خدمت مرکز اور سیکیورٹی ڈویژن سے افسران این سی سی آئی اے بھجوائے جائیں گے۔
ذرائع کا کہنا ہے کہ سی ٹی ڈی، ون فائیو اور اینٹی کار لفٹنگ سیل سے بھی افسران این سی سی آئی اے میں تعینات کرنے کا فیصلہ کیا گیا ہے۔وفاقی پولیس حکام کے مطابق افسران کو این سی سی آئی اے بھجوانے کا فیصلہ ادارے میں نفری کی شدید کمی کے باعث کیا گیا۔ نفری کی کمی کے باعث این سی سی آئی اے کو سائبر جرائم کی تحقیقات اور دیگر امور کی انجام دہی میں مشکلات کا سامنا ہے۔
یہ بھی پڑھیں: پاکستان میں کرنسی نوٹ چھاپنے پر 30 ارب روپے خرچ
ذرائع کے مطابق این سی سی آئی اے حکام پہلے ہی اسلام آباد پولیس سے معاونت اور اضافی نفری فراہم کرنے کی درخواست کر چکے تھے، جس کے بعد وفاقی پولیس نے افسران بھجوانے کا فیصلہ کیا۔بھجوائے جانے والے 23 افسران 26 ستمبر کو این سی سی آئی اے ہیڈ کوارٹر میں پیش ہوں گے، جہاں انہیں نئی ذمہ داریاں سونپی جائیں گی۔
