پشاور(پاک ترک نیوز ) خیبر پختونخوا حکومت نے پاکستان تحریک انصاف کے دورِ حکومت میں صوبائی اسمبلی سے منظور کیے گئے 74 قوانین کا جائزہ لینے کا فیصلہ کیا ہے۔سرکاری ذرائع کے مطابق محکمہ قانون نے قوانین کا جائزہ لینے کے لیے کمیٹی تشکیل دے دی ہے، جو سات روز میں اپنی سفارشات متعلقہ حکام کو پیش کرے گی۔جائزے میں 20 صوبائی محکموں سے متعلق قوانین شامل ہیں، جبکہ پراسیکیوشن، جامعات، میڈیکل ٹیچنگ اداروں اور صوبائی اسمبلی کے اختیارات و مراعات سے متعلق قوانین کا بھی جائزہ لیا جائے گا۔ خیبر پختونخوا پراسیکیوشن سروس ترمیمی ایکٹ 2025 بھی زیرِ غور قوانین میں شامل ہے۔
یہ بھی پڑھیں: پنجاب بھر میں دفعہ 144 کے نفاذ کے خلاف درخواست پر سماعت آج ہوگی
مشیر اطلاعات خیبر پختونخوا ثمر ہارون بلور نے کہا ہے کہ پی ٹی آئی دورِ حکومت میں منظور کیے گئے قوانین کا جائزہ لیا جا رہا ہے۔ ان کے مطابق خصوصی طور پر متنازع اور عجلت میں منظور کیے گئے قوانین کا جائزہ لیا جا رہا ہے۔
