لاہور( پاک ترک نیوز) امیر جماعت اسلامی حافظ نعیم الرحمان نے کہا ہے کہ حکومت نے مشکل حالات میں عوام کی جیبوں پر ڈاکا ڈالا، اپنی عیاشیاں ختم نہیں کیں اور پٹرولیم مصنوعات پر عائد لیوی کم کرنے کے بجائے عوام پر مزید بوجھ ڈال دیا۔اسلام آباد میں نیوز کانفرنس کرتے ہوئے حافظ نعیم الرحمان نے کہا کہ پٹرولیم مصنوعات پر سبسڈی کا فائدہ اکثریت کو نہیں مل رہا، اگر حکومت لیوی کم کردیتی تو تمام عوام کو براہ راست ریلیف مل سکتا تھا۔حافظ نعیم الرحمان نے کہا کہ جب عالمی مالیاتی ادارہ جاگیرداروں پر ٹیکس عائد کرنے کا کہتا ہے تو حکومت ایسا نہیں کرتی، غریب عوام پر ٹیکس کا بوجھ ڈال دیا جاتا ہے۔ تنخواہ دار طبقے سے سات سو ارب روپے سے زائد ٹیکس وصول کیا گیا۔
یہ بھی پڑھیں: وزیراعظم شہبازشریف کی کوہاٹ میں دھماکے کی مذمت
امیر جماعت اسلامی نے کہا کہ حکومت شرح سود میں تین فیصد کمی کردے تو پٹرولیم لیوی عائد کرنے کی ضرورت نہیں رہے گی، شرح سود میں کمی سے پانچ سو چورانوے ارب روپے کی بچت ہوسکتی ہے۔انہوں نے کہا کہ موجودہ حالات میں پرتعیش اشیا کی درآمد اور استعمال پر پابندی ہونی چاہیے، پٹرول مہنگا ہونے سے مہنگائی مزید بڑھے گی۔حافظ نعیم الرحمان نے الزام عائد کیا کہ حکومت عوام کی جیبوں پر بوجھ ڈال کر عالمی مالیاتی ادارے کا ہدف پورا کر رہی ہے۔ان کا کہنا تھا کہ حکومت اپنی کرپشن اور نااہلی ختم نہیں کرسکتی۔
