اسلام آباد ( پاک ترک نیوز) ملک بھر میں بچوں کو معذوری سے بچانے کیلئے انسدادِ پولیو مہم کا آغاز ہوگیا، مہم 27 ستمبر تک جاری رہے گی، جس کے دوران ملک بھر میں تین کروڑ سے زائد بچوں کو پولیو سے بچاؤ کے قطرے پلانے کا ہدف مقرر کیا گیا ہے۔پنجاب کے 13 اضلاع میں ایک کروڑ 6 لاکھ، سندھ کے 30 اضلاع میں ایک کروڑ، خیبرپختونخوا کے 37 اضلاع میں 73 لاکھ، بلوچستان کے 32 اضلاع میں 23 لاکھ جبکہ اسلام آباد میں 4 لاکھ 47 ہزار بچوں کو پولیو سے بچاؤ کے قطرے پلائے جائیں گے۔
کراچی میں انسدادِ پولیو مہم 21 سے 27 ستمبر تک جاری رہے گی، جہاں پانچ سال تک کی عمر کے 25 لاکھ بچوں کو پولیو سے بچاؤ کے قطرے پلانے کا ہدف مقرر کیا گیا ہے۔کمشنر کراچی نے ڈپٹی کمشنرز کو سو فیصد بچوں کی ویکسی نیشن یقینی بنانے کی ہدایت کی ہے۔ ڈپٹی کمشنرز روزانہ صبح پولیو ٹیموں کی تعیناتی اور سیکیورٹی انتظامات کی نگرانی کریں گے، جبکہ تمام ڈپٹی کمشنرز اور اسسٹنٹ کمشنرز کو فیلڈ میں رہ کر مہم کی پیش رفت سے آگاہ کرنے کی ہدایت بھی کی گئی ہے۔
خیبرپختونخوا کے تمام اضلاع میں بھی انسدادِ پولیو مہم شروع ہوگئی ہے۔ پشاور اور خیبر میں مہم سات روز جبکہ دیگر اضلاع میں چار روز تک جاری رہے گی۔صوبے میں تقریباً 73 لاکھ بچوں کو پولیو سے بچاؤ کے قطرے پلائے جائیں گے۔ مہم کیلئے 35 ہزار سے زائد تربیت یافتہ پولیو ٹیمیں تشکیل دی گئی ہیں، جبکہ سیکیورٹی کیلئے تقریباً 50 ہزار پولیس اہلکار تعینات کیے گئے ہیں۔
یہ بھی پڑھیں: پائیدار امن کے لیے تشدد، نفرت اور انتہا پسندی کا خاتمہ ناگزیر ہے،وزیراعلیٰ پنجاب
خیبرپختونخوا کے ایمرجنسی آپریشنز مرکز کے مطابق گزشتہ سال صوبے میں پولیو کے 20 کیسز رپورٹ ہوئے تھے، جبکہ رواں سال اب تک 3 کیسز سامنے آئے ہیں۔
