لاہور(پاک ترک نیوز )وزیراعلیٰ پنجاب مریم نواز شریف نے پولیو کے عالمی دن کے موقع پر اپنے خصوصی پیغام میں فرنٹ لائن پر خدمات انجام دینے والے پولیو ورکرز کو قوم کے ہیرو قرار دیتے ہوئے ان کے جذبے اور خدمات کو خراجِ تحسین پیش کیا ہے۔ انہوں نے پنجاب سے پولیو کے 100 فیصد خاتمے کے عزم کا اعادہ کرتے ہوئے والدین اور کمیونٹی سے انسدادِ پولیو مہم میں بھرپور تعاون کی اپیل کی ہے۔مریم نواز شریف نے کہا کہ پولیو ویکسینیشن سے انکار دراصل بچوں کے بہتر اور محفوظ مستقبل سے انکار ہے۔ پولیو سے مکمل نجات اور صحت مند معاشرے کے قیام کے لیے والدین سمیت ہر فرد کا بھرپور تعاون نہایت ضروری ہے۔
وزیراعلیٰ پنجاب نے کہا کہ انسدادِ پولیو کے قطرے مکمل طور پر محفوظ اور مؤثر ہیں اور بچوں کی زندگی اور صحت کے تحفظ کے لیے انتہائی اہم ہیں۔ انہوں نے والدین پر زور دیا کہ پانچ سال تک کی عمر کے تمام بچوں کو ہر انسدادِ پولیو مہم کے دوران پولیو سے بچاؤ کے دو قطرے لازمی پلوائیں۔مریم نواز شریف نے کہا کہ اللہ تعالیٰ کے فضل و کرم سے رواں برس پنجاب میں پولیو کا ایک بھی کیس سامنے نہیں آیا۔ صوبے سے پولیو کے مکمل خاتمے کے لیے صوبائی ایمرجنسی آپریشن سینٹر اور محکمہ صحت متحرک ہیں۔انہوں نے بتایا کہ انسدادِ پولیو مہم کے تحت پنجاب کے 13 حساس اضلاع میں پانچ سال سے کم عمر ایک کروڑ سے زائد بچوں کو پولیو سے بچاؤ کے قطرے پلائے گئے، جبکہ لاہور سمیت صوبے کے مختلف اضلاع میں باقاعدگی سے انسدادِ پولیو مہم کا انعقاد کیا جاتا ہے۔
یہ بھی پڑھیں: پٹرول پمپ ملازم پر تشدد کرنے والا شخص گرفتار، مریم نواز نے گرفتاری کی ویڈیو شیئر کر دی
وزیراعلیٰ پنجاب کے مطابق ملک بھر کے ساتھ پنجاب کے منتخب اضلاع میں بھی 2 سے 8 نومبر 2026 تک ذیلی قومی انسدادِ پولیو مہم کے لیے تیاریاں مکمل ہیں۔ پولیو وائرس کے پھیلاؤ کو روکنے کے لیے صوبے بھر میں ماحولیاتی نمونوں کی مسلسل جانچ بھی کی جاتی ہے۔مریم نواز شریف نے کہا کہ ڈسٹرکٹ ہیلتھ مینجمنٹ ٹیمیں (DHMT)، عالمی ادارۂ صحت (WHO) کے نمائندے اور ضلعی انتظامیہ انسدادِ پولیو مہم کی خود نگرانی کر رہے ہیں۔انہوں نے خبردار کیا کہ انسدادِ پولیو مہم کامیابی سے آگے بڑھ رہی ہے، تاہم مسلسل اور ہمہ جہت کوششوں کے بغیر پولیو دوبارہ پھیل سکتا ہے۔ اس لیے بچوں کو پولیو سے محفوظ رکھنے کے لیے ویکسینیشن کا تسلسل، عوامی آگاہی اور تمام متعلقہ اداروں کا تعاون ناگزیر ہے۔وزیراعلیٰ مریم نواز شریف نے اس عزم کا اظہار کیا کہ پنجاب کو پولیو سے مکمل پاک بنانے کے لیے تمام دستیاب وسائل بروئے کار لائے جائیں گے اور والدین سمیت معاشرے کے ہر فرد کو اس قومی کوشش میں اپنا کردار ادا کرنا ہوگا۔
