لاہور( پاک ترک نیوز) لاہور: لاہور ماس ٹرانزٹ اتھارٹی نے اورنج لائن ٹرین، میٹرو بس اور اسپیڈو بس سروس میں ٹوکن اور پرانے ٹرانزٹ کارڈ کے ذریعے کرایہ وصول کرنے کا نظام ختم کرتے ہوئے ڈیجیٹل ادائیگی کا نیا نظام نافذ کر دیا ہے۔
ماس ٹرانزٹ اتھارٹی کے انچارج عزیر شاہ کے مطابق مسافر اب پرانے ٹرانزٹ کارڈ استعمال نہیں کر سکیں گے، جبکہ ان کارڈز میں موجود بقایا رقم واپس نہیں کی جائے گی۔
انہوں نے بتایا کہ اب مسافر ٹی کیش کارڈ، سرکاری موبائل ایپلیکیشن اور اے ٹی ایم کارڈز کے ذریعے اورنج لائن، میٹرو بس اور اسپیڈو بسوں کا کرایہ ادا کر سکیں گے۔
یہ بھی پڑھیں: کوٹلی میں 2پریذائیڈنگ افسر معطل ،گرفتار کر لیا گیا
عزیر شاہ کا کہنا تھا کہ جو مسافر اپنے پرانے ٹرانزٹ کارڈ واپس کریں گے، انہیں صرف ایک سو تیس روپے بطور سیکیورٹی ڈپازٹ واپس کیے جائیں گے۔ انہوں نے شہریوں کو ہدایت کی کہ وہ اپنے پرانے کارڈ متعلقہ ٹرانزٹ اسٹیشنز پر جمع کرا دیں۔
دوسری جانب متعدد مسافروں نے شکایت کی ہے کہ پرانے کارڈ سسٹم کے خاتمے کے اعلان کے باوجود بعض مقامات پر انہیں اب بھی انہی کارڈز میں بیلنس ری چارج کرانے کا کہا جا رہا ہے۔ مسافروں کا یہ بھی کہنا ہے کہ کارڈ سسٹم ختم کرنے سے قبل عوام کو کوئی پیشگی اطلاع نہیں دی گئی، جس کے باعث انہیں مشکلات کا سامنا کرنا پڑ رہا ہے۔
