لاہور( پاک ترک نیوز) پنجاب حکومت نے لاہور کی سڑکوں اور شہری انفرااسٹرکچر کو بہتر بنانے کے لیے تین بڑے ترقیاتی منصوبوں کو سالانہ ترقیاتی پروگرام 2026-27 میں شامل کرنے کے لیے جائزہ لینے کی ہدایت کردی۔پنجاب کی وزیراعلیٰ نے متعلقہ حکام کو کٹر بند روڈ کی تعمیر اور توسیع کا منصوبہ تیار کرنے کی ہدایت کی ہے، جو ملتان روڈ سے غوثیہ روڈ تک تعمیر کی جائے گی۔
دوسرے منصوبے کے تحت کھڑک نالہ کو ملتان روڈ سے موٹروے تک کشادہ اور کور کرنے کی تجویز ہے۔ منصوبے میں موٹروے تک رسائی کے لیے نئی سڑک اور موٹروے انٹرچینج کی تعمیر بھی شامل ہے۔اس کے علاوہ جناح ٹرمینل سے بابو صابو تک موٹروے کے دونوں اطراف سروس روڈز تعمیر کرنے کی تجویز بھی زیرِ غور ہے۔
یہ بھی پڑھیں: خلیجی ممالک سے 21 ہزار 951 پاکستانی ڈی پورٹ
وزیراعلیٰ آفس نے متعلقہ محکموں کو منصوبوں پر ضروری کارروائی مکمل کرکے تفصیلی سمری تیار کرنے کی ہدایت کردی ہے، جسے منظوری کے لیے پیش کیا جائے گا۔حکومت کے مطابق منصوبوں کا مقصد لاہور میں ٹریفک کے دباؤ میں کمی، بہتر سفری سہولیات اور شہری انفرااسٹرکچر کو جدید بنانا ہے۔
