ریاض ( پاک ترک نیوز) مشرقِ وسطیٰ میں ایک نیا محاذ کھل گیا ۔۔ امریکہ اور سعودی عرب نے عراق میں ایران نواز گروپوں کے ٹھکانوں پر مشترکہ فضائی حملے کر دیے۔۔۔ واشنگٹن کا کہنا ہے کہ کارروائی امریکی افواج اور سعودی توانائی تنصیبات کو درپیش خطرات کے پیشِ نظر کی گئی۔
امریکی سینٹرل کمانڈ، سینٹ کام، کے مطابق عراق میں ایران کے حمایت یافتہ مسلح گروہ امریکی فوجی اڈوں اور سعودی عرب کے توانائی کے بنیادی ڈھانچے پر حملوں کی تیاری کر رہے تھے۔ امریکی حکام کا کہنا ہے کہ بروقت کارروائی کے ذریعے ان حملوں کا منصوبہ ناکام بنا دیا گیا۔
سعودی وزارتِ دفاع کے مطابق ایران نواز گروہوں نے حالیہ دنوں میں سعودی تیل تنصیبات کو ڈرون حملوں کا نشانہ بنایا تھا، جس کے جواب میں یہ مشترکہ کارروائی عمل میں لائی گئی۔ سعودی حکام کا کہنا ہے کہ مملکت کی سلامتی اور توانائی کے انفراسٹرکچر کا دفاع ہر صورت یقینی بنایا جائے گا۔
یہ بھی پڑھیں: چین کے قریب سے امریکی جدید جنگی بحری بیڑا مشرقِ وسطیٰ منتقل
عرب میڈیا کے مطابق سعودی رائل فضائیہ نے عراق کے بصرہ، واسط، کربلا اور نینوی میں واقع ایران نواز گروپوں کے ٹھکانوں کو فضائی حملوں میں نشانہ بنایا۔ حملوں کے بعد متاثرہ علاقوں سے دھویں کے بادل اٹھتے دیکھے گئے، تاہم جانی و مالی نقصان کی تفصیلات فوری طور پر سامنے نہیں آئیں۔
