لاہور( پاک ترک نیوز) چار دہائیوں تک پاکستانی ڈرامہ انڈسٹری پر راج کرنے والے عظیم اداکار عابد علی کی آج ساتویں برسی ہے۔ریڈیو پاکستان سے فنکارانہ سفر کا آغاز کرنے والے عابد علی نے اپنی غیر معمولی صلاحیتوں کے باعث جلد ہی پاکستان ٹیلی ویژن کے درخشندہ ستارے کی حیثیت حاصل کرلی۔ان کی باوقار شخصیت، رعب دار آواز اور جاندار اداکاری نے انہیں شائقین کے دلوں میں ایک منفرد مقام دلایا۔عابد علی نے سیکڑوں ٹی وی ڈراموں اور فلموں میں اپنی فنکارانہ صلاحیتوں کے جوہر دکھائے۔۔۔
عابد علی نے سیکڑوں ٹی وی ڈراموں اور فلموں میں اپنی فنکارانہ صلاحیتوں کے جوہر دکھائے۔۔۔مختلف النوع کرداروں کو اس انداز میں نبھایا کہ ہر کردار ان کی پہچان بن گیا۔ عابد علی صرف ایک اداکار نہیں تھے۔۔۔وہ ایک مکمل فنکار تھے، جنہوں نے اداکاری کے ساتھ ساتھ ہدایت کاری اور دیگر شعبوں میں بھی اپنی صلاحیتوں کا لوہا منوایا۔
یہ بھی پڑھیں: پنجاب کے امن و امان پر کوئی سمجھوتہ نہیں ہوگا، مریم نواز
ان کی آواز میں ایک خاص کشش تھی۔۔۔اور شخصیت میں ایسی وجاہت کہ وہ پردے پر آتے تو کردار خود بخود نمایاں ہوجاتا۔پاکستانی ڈرامہ انڈسٹری کے لیے ان کی خدمات کے اعتراف میں حکومت پاکستان نے 1985 میں صدارتی تمغہ برائے حسنِ کارکردگی سے نوازا۔عابد علی 2019 میں دنیا سے رخصت ہوگئے۔۔۔لیکن ان کے نبھائے ہوئے کردار، ان کی آواز اور ان کا فن آج بھی شائقین کے دلوں میں زندہ ہے۔چار دہائیوں تک فن کی دنیا پر راج کرنے والا یہ ستارہ آج ہمارے درمیان نہیں۔۔۔
مگر عابد علی جیسے فنکار مرتے نہیں، اپنے فن کے ذریعے ہمیشہ زندہ رہتے ہیں۔
