انقرہ ( پاک ترک نیوز) ترکیہ کے معروف اداکار سرحات مصطفیٰ کیلیچ، جو مقبول تاریخی ڈرامہ سیریل ’’کورولوش عثمان‘‘ میں میخائل کوسس کا کردار ادا کرکے دنیا بھر میں شہرت حاصل کرچکے تھے، 51 برس کی عمر میں انتقال کرگئے۔سرحات مصطفیٰ کیلیچ کی لاش ان کے گھر سے ملی پولیس اور طبی ٹیموں نے موقع پر پہنچ کر اداکار کی موت کی تصدیق کی۔
رپورٹس کے مطابق سرحات کیلیچ سے ان کی دوست اوزلم ای کئی روز سے رابطہ کرنے کی کوشش کررہی تھیں، تاہم جب جمعرات سے اداکار کی جانب سے کوئی جواب نہیں ملا تو انہیں تشویش ہوئی۔ بعد ازاں اوزلم ای اداکار کے گھر پہنچیں۔دروازہ کھٹکھٹانے پر کوئی جواب نہ ملنے کے بعد انہوں نے اپنے پاس موجود چابی سے گھر کھولا، جہاں اداکار ڈرائنگ روم میں ایک کرسی پر بے حس و حرکت بیٹھے ہوئے ملے۔ اوزلم ای نے بتایا کہ سرحات کیلیچ سانس نہیں لے رہے تھے اور ان کا جسم ٹھنڈا ہوچکا تھا۔
انہوں نے فوری طور پر 112 ایمرجنسی سروس کو اطلاع دی۔ پولیس اور طبی امدادی ٹیمیں موقع پر پہنچیں، جہاں طبی عملے نے معائنے کے بعد اداکار کی موت کی تصدیق کردی۔ پولیس کی جانب سے حاصل کیے گئے بیان میں اوزلم ای نے بتایا کہ سرحات کیلیچ لمف کینسر کا سامنا کررہے تھے۔ تاہم حکام نے تاحال یہ نہیں کہا کہ اداکار کی موت براہِ راست کینسر کے باعث ہوئی یا کوئی اور طبی وجہ اس کا سبب بنی۔اداکار کی اچانک موت کے بعد پولیس نے واقعے کی تحقیقات شروع کردی ہیں۔ ابتدائی طور پر موت کی وجہ واضح نہیں ہوسکی، اسی لیے حتمی نتیجے کے لیے طبی و قانونی کارروائی جاری ہے۔
یہ بھی پڑھیں: ڈرامہ انڈسٹری کے بے تاج بادشاہ عابد علی کی ساتویں برسی
ترک میڈیا کی تازہ رپورٹس کے مطابق موت کی حتمی وجہ پوسٹ مارٹم اور فرانزک معائنے کے بعد ہی سامنے آئے گی۔ اس لیے اس مرحلے پر موت کو کسی مخصوص بیماری یا دوسرے سبب سے منسوب کرنا قبل از وقت ہوگا۔ سرحات مصطفیٰ کیلیچ کو پاکستان سمیت دنیا بھر میں سب سے زیادہ شہرت ’’کورولوش عثمان‘‘ سے ملی، جہاں انہوں نے میخائل کوسس/کوسے میہال کا کردار ادا کیا۔
