سڈنی(پاک ترک نیوز ) آسٹریلیا کے شہر سڈنی میں تقریباً چالیس برس سے زیرِ غور منصوبہ عملی شکل اختیار کرگیا۔ ویسٹرن سڈنی بین الاقوامی ہوائی اڈہ مسافروں کے لیے کھول دیا گیا ہے۔
فراہم کردہ رپورٹ کے مطابق شہر کے مرکزی کاروباری علاقے سے تقریباً ۶۰ کلومیٹر دور واقع ہوائی اڈے کی تعمیر پر 5 ارب 30 کروڑ آسٹریلوی ڈالر خرچ ہوئے ہیں۔ یہ ہوائی اڈہ چوبیس گھنٹے کام کرے گا اور سڈنی کے موجودہ کنگزفورڈ سمتھ ہوائی اڈے پر دباؤ کم کرنے میں مدد دے گا۔
نئے ہوائی اڈے سے جیٹ اسٹار کی پہلی مسافر پرواز گولڈ کوسٹ کے لیے مقرر کی گئی ہے۔ ایئر نیوزی لینڈ ۲۶ اکتوبر سے آکلینڈ کے لیے ہفتے میں تین، جبکہ سنگاپور ایئرلائنز نومبر سے روزانہ پروازیں شروع کرے گی۔
ویت جیٹ، فجی ایئرویز، قنطاس اور قطر ایئرویز نے بھی آئندہ مختلف مراحل میں یہاں سے پروازیں شروع کرنے کے منصوبے بنائے ہیں۔
ہوائی اڈے تک رسائی کے لیے سینٹ میریس ریلوے اسٹیشن سے ہر تیس منٹ بعد مفت بس چلائی جائے گی، جبکہ پیراماٹا اور سینٹرل اسٹیشن سے خصوصی بس کا کرایہ ۲۵ آسٹریلوی ڈالر ہوگا۔ ہوائی اڈے کو ملانے والا تیز رفتار ریل منصوبہ کم از کم آئندہ برس دسمبر تک مکمل ہونے کی توقع ہے۔
حکام کے مطابق مغربی سڈنی کے 25 لاکھ سے زیادہ رہائشیوں کو اس ہوائی اڈے سے مقامی سطح پر سفری سہولت مل سکے گی۔ مستقبل میں یہاں سالانہ 18 لاکھ ٹن تک فضائی سامان سنبھالنے کی گنجائش پیدا کرنے کا بھی منصوبہ ہے۔
