لاہور( پاک ترک نیوز) پنجاب میں کاؤنٹر ٹیررازم ڈیپارٹمنٹ کی دہشت گردوں کے خلاف کارروائیاں جاری ہیں، ایک ماہ کے دوران 158 انٹیلی جنس بیسڈ آپریشنز کیے گئے، جن میں 23 دہشت گرد گرفتار کرلیے گئے۔سی ٹی ڈی ترجمان کے مطابق ساہیوال سے را کے ایک خطرناک دہشت گرد کو بھی گرفتار کیا گیا۔ گرفتار دہشت گردوں کی شناخت ہدایت اللہ، محمد مجاہد، تسلیم حسنین اور طارق اللہ کے نام سے ہوئی ہے۔ترجمان کے مطابق گرفتار دہشت گردوں کے قبضے سے دھماکہ خیز مواد، 7 آئی ای ڈیز، 26 ڈیٹونیٹرز اور 48 فٹ فیوز وائر برآمد کی گئی۔
حکام کے مطابق گرفتار دہشت گردوں کے خلاف 22 مقدمات درج کرلیے گئے ہیں، جبکہ مزید تفتیش جاری ہے۔سی ٹی ڈی ترجمان کا کہنا ہے کہ پنجاب بھر میں ایک ماہ کے دوران 4 ہزار 601 کومبنگ آپریشنز بھی کیے گئے، جن کے دوران 4 لاکھ 2 ہزار مشتبہ افراد کو گرفتار کیا گیا۔ترجمان کے مطابق کومبنگ آپریشنز کے دوران مجموعی طور پر ایک لاکھ 66 ہزار 553 افراد کو چیک کیا گیا۔
یہ بھی پڑھیں: پنجاب کی ماتحت عدالتوں میں عملے کی بھرتیوں کا 150 سال پرانا نظام ختم
سی ٹی ڈی ترجمان کا کہنا ہے کہ محفوظ پنجاب کے ہدف کے تحت دہشت گردوں اور ان کے سہولت کاروں کے خلاف کارروائیاں جاری رہیں گی۔
