تہران ( پاک ترک نیوز) ایرانی پاسدارانِ انقلاب کے نائب سیاسی کمانڈر عزیز غضنفری نے خبردار کیا ہے کہ اگر ایران کی تیل کی برآمدات روکنے کی کوشش کی گئی تو خطے کے کسی دوسرے ملک کو بھی تیل برآمد کرنے کی اجازت نہیں دی جائے گی۔ایرانی سرکاری خبر رساں ادارے ارنا کے مطابق عزیز غضنفری نے اپنے بیان میں کہا کہ اگر ایران سے تیل برآمد نہیں کیا جائے گا تو خطے کے کسی دوسرے ملک سے بھی تیل کی برآمد نہیں ہونے دی جائے گی۔
عزیز غضنفری نے دعویٰ کیا کہ آبنائے ہرمز پاسدارانِ انقلاب کی بحری افواج کی مکمل نگرانی میں ہے۔ ان کا کہنا تھا کہ ایران کو اپنی سلامتی اور دفاعی صلاحیت مضبوط بنانے کے لیے آبنائے ہرمز پر اپنا کنٹرول مزید بڑھانا چاہیے۔ایرانی عہدیدار نے کہا کہ اگر ایران غیر محفوظ ہوگا تو خطے میں کوئی مقام محفوظ نہیں رہے گا، اور اگر ایرانی عوام عدم تحفظ میں زندگی گزاریں گے تو خطے کے عوام بھی عدم تحفظ سے دوچار رہیں گے۔دوسری جانب عزیز غضنفری نے دعویٰ کیا کہ خطے میں موجود تمام امریکی فوجی اڈوں کو ناقابلِ استعمال بنا دیا گیا ہے۔ان کے مطابق ان امریکی اڈوں کا مقصد خطے کے ممالک اور امریکا کی سلامتی یقینی بنانا تھا، تاہم اب یہ اڈے ملبے کے ڈھیروں میں تبدیل ہوچکے ہیں۔
یہ بھی پڑھیں: صدر آزاد کشمیر کے انتخاب کیلئے نجیب نقی اور لطیف اکبر کے کاغذات جمع
ایرانی پاسدارانِ انقلاب کے عہدیدار کے یہ بیانات ایسے وقت میں سامنے آئے ہیں جب آبنائے ہرمز اور خطے میں بحری آمد و رفت کے حوالے سے کشیدگی برقرار ہے اور عالمی منڈی میں تیل کی فراہمی متاثر ہونے کے خدشات بھی موجود ہیں۔ایران کی جانب سے آبنائے ہرمز پر کنٹرول مزید بڑھانے اور تیل کی برآمدات سے متعلق یہ بیان خطے میں جاری کشیدگی کے تناظر میں اہم قرار دیا جا رہا ہے۔
