اسلام آباد ( پاک ترک نیوز) وزیراعظم شہباز شریف کا عالمی یوم سرطان کے حوالے سے اپنا خصوصی پیغام میں کہنا ہے کہ آج پاکستان کینسر کے عالمی دن پر دنیا کے ساتھ ہم آواز ہو کر اس موذی مرض سے متاثرہ تمام افراد سے اظہار یکجہتی اور متاثرین پر اس مرض کے بوجھ کو کم کرنے کے عزم کا اعادہ کرتاہے۔
سرطان کے خلاف جدوجہد صرف ایک طبی چیلنج ہی نہیں بلکہ یہ جنگ ایک مشترکہ قومی ذمہ داری ہے، جو ہمدردی، حوصلے اور اجتماعی کاوشوں کی متقاضی ہے۔
حکومت پاکستان نے پالیسی اصلاحات اور وسیع تر شراکت داریوں کے ذریعے، بالخصوص گزشتہ ایک برس میں سرطان کے خلاف قومی ردعمل کو مزید موثر، مربوط اور مضبوط بنایا ہے۔
سرکاری و نجی شعبے کے باہمی تعاون سے پسماندہ طبقات سے تعلق رکھنے والے کینسر کے مریضوں کو زندگی بچانے والے علاج کی فراہمی اور علاج میں حائل مالی اور جغرافیائی رکاوٹوں کو کم کرنے میں خاطر خواہ کامیابی ملی ہے۔
مزید براں حکومت، سرطان کی روک تھام کے لیے ایک جامع قومی حکمت عملی کی تیاری پر بھی سرگرم عمل ہے تاکہ اس مرض سے نمٹنے کے لیے اجتماعی قومی صلاحیت کو مستحکم انداز میں بروئے کار لایا جا سکے۔
اس تناظر میں حکومت قومی اور صوبائی سطح پر جامع اقدامات کو آگے بڑھانے کے لیے پرعزم ہے، جن میں خاص طور پر کمزور اور محروم طبقات کی مدد سر فہرست ہے۔
مجموعی طور پر صحت کے شعبے میں بنیادی ڈھانچے کی اصلاح ، تحقیق، اور سائنسی شواہد پر مبنی فیصلوں پر سرمایہ کاری ہماری حکمت عملی کا اہم حصہ ہے۔
سرطان کے خطرناک اثرات میں کمی کے لیے اسکے پھیلاو میں روک تھام کلیدی حیثیت رکھتا ہے۔
عوامی سطح پر صحت مند طرز زندگی کے فروغ اور آگاہی کے لیے کمیونٹیز، سول سوسائٹی، نجی شعبے اور ذرائع ابلاغ کی فعال شمولیت ناگزیر ہے۔
آج کے خصوصی دن پر میں انفرادی اور اجتماعی، سماجی اور عوامی سطح پر تمام متعلقہ فریقین سے اپیل کرتا ہوں کہ اس موذی مرض کے خلاف انسانی صحت کے تخفظ کے اس مشترکہ مشن کے لیے متحد ہو جائیں۔
حکومتی اور نجی سطح پر باہم تعاون اور ہم آہنگی سے ہم اس مرض کی بروقت تشخیص، موثر علاج اور ہمدردانہ نگہداشت کو یقینی بنا سکتے ہیں۔
خلوص نیت پر مبنی باہمی تعاون اور اجتماعی کاوشوں سے ہی ہم آنے والی نسلوں کے لیے ایک صحت مند اور مضبوط پاکستان کی ضمانت دے سکتے ہیں۔
کینسر کے خلاف جدوجہد صرف طبی چیلنج نہیں بلکہ یہ جنگ ایک مشترکہ قومی ذمہ داری ہے،وزیراعظم
