اسلام آباد ( پاک ترک نیوز) وفاقی وزیر اطلاعات عطا اللہ تارڑ کا کہنا ہے کہ افغانستان کے خلاف جاری آپریشن غضب للحق میں اب تک 331 افغان طالبان ہلاک جبکہ 500 سے زائد زخمی ہو چکے ہیں۔
عطا تارڑ نے کہا کہ کارروائی کے دوران افغان طالبان کی 104 چیک پوسٹیں تباہ کر دی گئی ہیں جبکہ 22 پر قبضہ کر لیا گیا ہے۔ انہوں نے دعویٰ کیا کہ آپریشن میں 163 ٹینک اور مسلح گاڑیاں بھی تباہ کی گئیں جبکہ افغانستان کے اندر 37 مقامات کو فضائی کارروائی میں مؤثر انداز میں نشانہ بنایا گیا۔
سیکیورٹی ذرائع کے مطابق پاک فوج کی جانب سے افغان طالبان رجیم کی بلااشتعال جارحیت کے خلاف زمینی اور فضائی کارروائیاں جاری ہیں، ذرائع کے مطابق پاک افغان سرحد پر حالیہ کشیدگی کے بعد طالبان رجیم کو ہر محاذ پر پسپائی کا سامنا ہے۔
قلعہ سیف اللہ سیکٹر میں افغانستان کی رحیم تھانہ پوسٹ کو مکمل طور پر تباہ کر دیا گیا ہے۔ پاک فوج کی کارروائیاں صرف عسکری اہداف تک محدود ہیں اور کسی بھی سویلین ہدف یا آبادی کو نشانہ نہیں بنایا جا رہا۔
سکیورٹی حکام کے مطابق آپریشن کا مقصد سرحدی علاقوں میں امن و استحکام کو یقینی بنانا اور پاکستان کی خودمختاری کا دفاع کرنا ہے، جبکہ صورتحال پر مسلسل نظر رکھی جا رہی ہے۔
آپریشن غضب للحق جاری، 331 افغان طالبان ہلاک، متعدد چیک پوسٹیں اور ٹینک تباہ
