اسلام آباد(پاک ترک نیوز)غلط معلومات اور فیک نیوز آج کے دور کا سب سے بڑا چیلنج ہیں، انٹرنیٹ پر ایک کلک شہریوں کی نجی معلومات اور ذاتی ڈیٹا کو خطرے میں ڈال سکتا ہے۔ وفاقی وزیر اطلاعات عطا تارڑ کہتے ہیں سائبر خطرات اور غلط معلومات سے نمٹنے کے لیے مربوط، جامع اور مشترکہ حکمت عملی اپنانا ہوگی۔
اسلام آباد میں سائبر سکیورٹی آگاہی تقریب سے خطاب کرتے ہوئے عطا تارڑ نے کہا کہ ورلڈ اکنامک فورم میں شرکاء نے فیک نیوز اور مس انفارمیشن کو بڑا خطرہ قرار دیا۔ ڈیجیٹل آگاہی کو صرف مہمات تک محدود نہیں رکھا جا سکتا، بلکہ تعلیمی نظام میں تبدیلی لانا ضروری ہے۔
وفاقی وزیر اطلاعات کا کہنا تھا کہ ڈیجیٹل دنیا میں تیزی سے آنے والی تبدیلیوں کے پیش نظر مؤثر نظام تشکیل دینے کی ضرورت ہے۔ مصنوعی ذہانت سے تیار کردہ مواد کی نشاندہی کے لیے لیبلنگ لازمی ہونی چاہیے۔
یہ بھی پڑھیں: سہ ملکی سیریز فائنل : سری لنکا کی پاکستان کیخلاف پراعتماد بیٹنگ جاری
عطا تارڑ نے مزید کہا کہ ہر سرکاری ادارے میں ڈیجیٹل خواندگی کے لیے الگ سیل قائم کرنے کی ضرورت ہے، پی ٹی اے اس سلسلے میں کونسل کی قیادت کرے، حکومت بھرپور معاونت فراہم کرے گی۔
