گلگت ( پاک ترک نیوز) گلگت بلتستان کے ضلع شگر میں واقع دنیا کی بارہویں بلند ترین چوٹی براڈ پیک پر برفانی تودہ گرنے 10 غیر ملکی اور پاکستانی کوہ پیماؤں لاپتا ہو گئے جس کی تلاش کا آپریشن جاری ہے، جبکہ نیپالی میڈیا نے دو ممکنہ لاشوں کی نشاندہی کا دعویٰ کیا ہے۔
الپائن کلب پاکستان کے مطابق 8 ہزار 47 میٹر بلند براڈ پیک کو سر کرنے کی مہم کے دوران کوہ پیما برفانی تودے کی زد میں آ گئے، جس کے بعد ان سے رابطہ منقطع ہو گیا۔
حکام کے مطابق سرچ آپریشن کی قیادت معروف پاکستانی کوہ پیما سرباز خان کر رہے ہیں۔ ریسکیو ٹیمیں دشوار گزار اور برف سے ڈھکے علاقے میں لاپتا کوہ پیماؤں کی تلاش میں مصروف ہیں، تاہم خراب موسم، شدید سردی اور دشوار راستوں کے باعث امدادی کارروائیوں میں مشکلات پیش آ رہی ہیں۔
یہ بھی پڑھیں:ورلڈ کپ 2027 ہدف، مکمل فٹ ہوں اور کم بیک کے لیے تیار ہوں: فخر زمان
نیپالی میڈیا نے دعویٰ کیا ہے کہ سرچ آپریشن کے دوران براڈ پیک پر دو ممکنہ لاشوں کی لوکیشن کا سراغ ملا ہے، تاہم ریسکیو حکام کی جانب سے تاحال اس دعوے کی باضابطہ تصدیق نہیں کی گئی۔ سرچ ٹیمیں مزید شواہد اکٹھے کرنے اور لاپتا کوہ پیماؤں کا سراغ لگانے کے لیے کارروائیاں جاری رکھے ہوئے ہیں۔
واضح رہے کہ براڈ پیک قراقرم کے پہاڑی سلسلے میں کے ٹو کے قریب واقع دنیا کی بارہویں بلند ترین چوٹی ہے، جسے دنیا کی مشکل ترین کوہ پیمائی مہمات میں شمار کیا جاتا ہے۔ حکام کا کہنا ہے کہ سرچ آپریشن اس وقت تک جاری رہے گا جب تک تمام لاپتا کوہ پیماؤں کے بارے میں حتمی معلومات حاصل نہیں ہو جاتیں۔
