اسلام آباد (پاک ترک نیوز )وزیراعظم پاکستان شہباز شریف دورہ سعودی عرب مکمل کرنے کے بعد پاکستانی وفد کے ہمراہ وطن واپس پہنچ گئے ۔
وطن واپسی سے قبل وزیراعظم شہباز شریف نے پاکستانی وفد کے ہمراہ مسجد نبوی ﷺ میں حاضری دی۔
وزیراعظم نے ریاض الجنہ میں نوافل ادا کیے اور ملک و قوم کی ترقی، خوشحالی اور سلامتی کے لیے دعا کی۔
شہباز شریف نے روضہ رسول ﷺ پر بھی حاضری دی، جہاں انہیں زیارتِ خاص کی سعادت حاصل ہوئی۔
مدینہ ایئرپورٹ پر گورنر مدینہ شہزادہ سلمان بن سلطان بن عبدالعزیز آل سعود نے وزیراعظم شہباز شریف اور پاکستانی وفد کو الوداع کیا۔
وزیراعظم کے ہمراہ نائب وزیراعظم و وزیر خارجہ سینیٹر محمد اسحاق ڈار، وفاقی وزیر دفاع خواجہ محمد آصف، وزیر اطلاعات و نشریات عطااللہ تارڑ اور معاون خصوصی طارق فاطمی بھی تھے۔
وزیراعظم شہباز شریف پاکستانی وفد کے ہمراہ سعودی عرب کے خصوصی دورے پر گئے تھے، جہاں پاکستان، سعودی عرب اور ترکیہ کے درمیان مشترکہ دفاعی معاہدے پر دستخط کیے گئے۔
دورے کے دوران تینوں ممالک کے درمیان دفاعی تعاون کو مزید مضبوط بنانے اور مشترکہ سلامتی کے حوالے سے اہم پیش رفت سامنے آئی۔
