جدہ(پاک ترک نیوز)سعودی عرب میں ٹریفک کے المناک حادثے نے 7 بنگلادیشی شہریوں کی جان لے لی، جاں بحق ہونے والوں میں خواتین اور بچے بھی شامل ہیں۔
بنگلادیشی قونصل خانے کے حکام کے مطابق حادثہ مدینہ منورہ سے جدہ جاتے ہوئے ایک شاہراہ پر پیش آیا، جہاں ڈرائیور گاڑی پر قابو نہ رکھ سکا اور گاڑی حادثے کا شکار ہوگئی۔ حادثے میں سوار تمام سات افراد موقع پر ہی دم توڑ گئے۔
جاں بحق افراد سعودی عرب میں ایک کمپنی میں ملازمت کرتے تھے اور ان کا تعلق بنگلادیش کے ضلع کاکس بازار کی تحصیل چکاریا سے تھا۔
کمپنی کے مارکیٹنگ منیجر نورالزمان کے مطابق جاں بحق افراد میں کمپنی کے اسٹور کیپر ضیاء الرحمٰن، ان کے دو بیٹے اور ایک بیٹی، فورک لفٹ ڈرائیور الیاس کی اہلیہ، مکہ مکرمہ میں اسٹور کیپر عالم شاہ اور ان کی ایک ماہ کی بیٹی شامل ہیں۔
حادثے کی اطلاع ملتے ہی مقامی پولیس اور امدادی ٹیمیں جائے وقوعہ پر پہنچ گئیں اور لاشوں کو نکال کر مقامی اسپتال کے مردہ خانے منتقل کردیا گیا۔
