ڈیووس : (پاک ترک نیوز)وزیراعظم محمد شہباز شریف ورلڈ اکنامک فورم کے سالانہ اجلاس میں شرکت کے لیے سوئٹزرلینڈ پہنچ گئے ہیں، جہاں وہ عالمی معیشت، سرمایہ کاری اور ترقی سے متعلق اہم مباحث میں پاکستان کا مؤقف پیش کریں گے۔
زیورخ آمد پر اقوام متحدہ میں پاکستان کے مستقل نمائندے محمد بلال، سوئٹزرلینڈ میں تعینات پاکستانی سفیر مرغوب سلیم اور سفارتی حکام نے وزیراعظم کا استقبال کیا۔
وزیراعظم کے ہمراہ نائب وزیراعظم اور وزیر خارجہ اسحاق ڈار، وفاقی وزیر اقتصادی امور احد چیمہ، وزیر خزانہ محمد اورنگزیب، وزیر اطلاعات عطا اللہ تارڑ اور معاون خصوصی طارق فاطمی بھی موجود ہیں۔
ورلڈ اکنامک فورم کے دوران وزیراعظم مختلف سیشنز میں شرکت کریں گے، جہاں وہ پاکستان میں جاری معاشی اصلاحات، معاشی استحکام اور مستقبل کی اقتصادی سمت پر روشنی ڈالیں گے۔
اس موقع پر عالمی رہنماؤں اور بین الاقوامی اداروں کے سربراہان سے ملاقاتیں بھی شیڈول ہیں۔اجلاس کے موقع پر وزیراعظم پاکستان اور ورلڈ اکنامک فورم کے اشتراک سے منعقد ہونے والے بزنس راؤنڈ ٹیبل میں بھی شرکت کریں گے، جہاں غیر ملکی سرمایہ کاروں کو پاکستان میں سرمایہ کاری کے مواقع سے آگاہ کیا جائے گا۔
وزیراعظم "ٹرپل او” پروگرام — آرڈر، آپرچونیٹی اور آپٹیمائزیشن — کے تحت پاکستان کی معاشی حکمت عملی پر بھی اظہارِ خیال کریں گے۔
ورلڈ اکنامک فورم اجلاس، وزیراعظم کی صدر ٹرمپ سے ملاقات متوقع
