مظفرآباد(پاک ترک نیوز ) بیرسٹر افتخار گیلانی نے آزاد کشمیر کے 17ویں وزیراعظم کی حیثیت سے حلف اٹھا لیا۔ قائم مقام صدر آزاد کشمیر چوہدری طارق فاروق نے ایوان صدر مظفرآباد میں نومنتخب وزیراعظم سے حلف لیا۔
آزاد کشمیر قانون ساز اسمبلی میں وزیراعظم کے انتخاب کے لیے مجموعی طور پر 44 ووٹ ڈالے گئے، جس میں مسلم لیگ ن کے امیدوار بیرسٹر افتخار گیلانی نے 30 ووٹ حاصل کرکے کامیابی حاصل کی، جبکہ پیپلز پارٹی کے امیدوار سردار مختار احمد عباسی کو 14 ووٹ ملے۔ اسمبلی کے 46 ارکان میں سے 2 ارکان نے ووٹنگ میں حصہ نہیں لیا۔
بیرسٹر افتخار گیلانی ٹیکنوکریٹ نشست پر مسلم لیگ ن کے ٹکٹ پر رکن اسمبلی منتخب ہوئے تھے۔ وہ اس سے قبل آزاد کشمیر کے وزیر تعلیم بھی رہ چکے ہیں اور پہلی بار 2011 میں قانون ساز اسمبلی کے رکن منتخب ہوئے تھے۔
بیرسٹر افتخار گیلانی کی کامیابی کے بعد مسلم لیگ ن تقریباً ایک دہائی بعد آزاد کشمیر میں دوبارہ حکومت بنانے میں کامیاب ہوگئی ہے۔ نومنتخب وزیراعظم کی حلف برداری کی تقریب کے لیے ایوان صدر مظفرآباد میں خصوصی انتظامات کیے گئے، جبکہ تقریب میں 300 مہمانوں کے لیے دعوتی کارڈ جاری کیے گئے۔
بیرسٹر افتخار گیلانی کے وزیراعظم منتخب ہونے کے بعد آزاد کشمیر میں نئی کابینہ کی تشکیل کا مرحلہ شروع ہوگا، جس کے لیے آئندہ دنوں میں مشاورت کی جائے گی۔
وزیراعظم کے انتخاب کے موقع پر مسلم لیگ ن کے اندر سامنے آنے والے اختلافات کے باوجود انتخابی عمل مکمل ہوا۔ سابق وزیراعظم راجہ فاروق حیدر نے بیرسٹر افتخار گیلانی کے ہمراہ اسمبلی پہنچ کر سیاسی حلقوں کو حیران کردیا، جبکہ مسلم لیگ ن کے صدر شاہ غلام قادر اسمبلی اجلاس میں شریک نہیں ہوئے۔
