اسلام آباد(پاک ترک نیوز ) نائب وزیراعظم اور وزیر خارجہ اسحاق ڈار کی زیر صدارت اضافی چینی کی برآمد سے متعلق کابینہ کمیٹی کا اجلاس ہوا، جس میں چینی کی برآمد کے لیے جاری اقدامات اور انتظامی، تکنیکی و طریقہ کار کے فریم ورک کا جائزہ لیا گیا۔
اجلاس میں چینی کے موجودہ ذخائر اور ملکی ضروریات کا تفصیلی جائزہ لیا گیا۔ اسحاق ڈار نے کہا کہ چینی کی برآمد سے ملکی قیمتوں کا استحکام متاثر نہیں ہونا چاہیے۔
نائب وزیراعظم کا کہنا تھا کہ فاضل زرعی اجناس کی برآمد سے زرعی معیشت کو مضبوط بنانے اور قیمتی زرمبادلہ حاصل کرنے میں مدد ملتی ہے، تاہم ملکی صارفین کا تحفظ حکومت کی اولین ترجیح ہے۔
اسحاق ڈار نے قومی ضروریات پوری کرنے کے لیے چینی کے اسٹریٹجک ذخائر برقرار رکھنے کی ہدایت کرتے ہوئے کہا کہ چینی کی برآمد کے دوران خوردہ قیمتوں میں اضافے کا دباؤ نہیں پڑنا چاہیے۔
اجلاس میں وفاقی وزرائے قومی غذائی تحفظ و تحقیق اور اقتصادی امور، وزیر مملکت برائے خزانہ، وزیراعظم کے مشیر برائے صنعت و پیداوار اور معاون خصوصی طارق باجوہ نے شرکت کی۔
اس کے علاوہ وفاقی سیکریٹریز اور متعلقہ وزارتوں و محکموں کے سینئر حکام بھی اجلاس میں شریک ہوئے۔
