راولپنڈی ( پاک تر ک نیوز) مسلح افواج پاکستان نے قوم کو 79ویں یومِ آزادی کی مبارکباد پیش کرتے ہوئے قائداعظم محمد علی جناح اور تحریکِ آزادی کے شہداء سمیت آزادی کے لیے قربانیاں دینے والے تمام افراد کو خراجِ عقیدت پیش کیا ہے۔
آئی ایس پی آر کے مطابق فیلڈ مارشل سید عاصم منیر، چیف آف آرمی اسٹاف، ایئر چیف مارشل اور نیول چیف نے قوم کو یومِ آزادی کی مبارکباد دی۔
آئی ایس پی آر کا کہنا ہے کہ قائداعظم محمد علی جناح اور بانیانِ پاکستان کا وژن، عزم اور حوصلہ آج بھی پوری قوم کے لیے رہنمائی کا ذریعہ ہے۔
پاک فوج کے شعبہ تعلقاتِ عامہ کے مطابق پاکستان کی آزادی کے لیے دی جانے والی قربانیاں قوم کے لیے عظیم ورثہ ہیں، جبکہ مادرِ وطن کے دفاع اور سلامتی کے لیے مسلح افواج کا عزم غیر متزلزل ہے۔
یہ بھی پڑھیں: یومِ آزادی: مزارِ قائد پر گورنر و وزیراعلیٰ سندھ کی حاضری، اسلام آباد میں پرچم کشائی
آئی ایس پی آر نے کہا کہ ملک کو درپیش تمام خطرات کے خلاف مادرِ وطن کے دفاع کے لیے غیر متزلزل عزم برقرار ہے۔ مسلح افواج پاکستان کی خودمختاری، سلامتی اور قومی وقار کے تحفظ کے لیے اپنی ذمہ داریاں پوری کرتی رہیں گی۔
یومِ آزادی کے موقع پر مسلح افواج نے اس عزم کا اعادہ کیا کہ بانیانِ پاکستان کے وژن کی روشنی میں ملک کی سلامتی، ترقی، خوشحالی اور استحکام کے لیے قومی جذبے کے ساتھ اپنا کردار جاری رکھا جائے گا۔
