واشنگٹن ( پاک ترک نیوز) امریکی فضائیہ نے کہا ہے کہ نئی نسل کے ایف-47 جنگی طیارے کی تیاری منصوبے کے مطابق جاری ہے اور اس کی پہلی آزمائشی پرواز 2028 میں متوقع ہے۔
امریکی فضائیہ کے اعلیٰ حکام کے مطابق نیکسٹ جنریشن ایئر ڈومیننس (این جی اے ڈی) پروگرام کے تحت تیار کیا جانے والا ایف-47 چھٹی نسل کا جدید جنگی طیارہ ہوگا، جو موجودہ ایف-22 ریپٹر کی جگہ لے گا۔
حکام نے بتایا کہ طیارہ اب انجینئرنگ اور مینوفیکچرنگ ڈویلپمنٹ مرحلے میں داخل ہو چکا ہے، جس کے دوران مختلف نظاموں کو یکجا کیا جائے گا، کارکردگی کو بہتر بنایا جائے گا اور آزمائشی مقاصد کے لیے محدود تعداد میں طیارے تیار کیے جائیں گے۔
اگرچہ امریکی فضائیہ نے آزمائشی مرحلے میں تیار کیے جانے والے طیاروں کی تعداد ظاہر نہیں کی، تاہم حکام کا کہنا ہے کہ منصوبے میں ابتدائی محدود پیمانے پر پیداوار کی گنجائش بھی شامل ہے، جس سے ظاہر ہوتا ہے کہ منصوبے پر انجینئرنگ کا کام پہلے ہی خاصا آگے بڑھ چکا ہے۔
امریکی فضائیہ کے حکام نے اس عزم کا اعادہ کیا کہ ایف-47 موجودہ امریکی انتظامیہ کے دور میں پہلی پرواز کرے گا اور منصوبہ مقررہ شیڈول کے مطابق آگے بڑھ رہا ہے۔
یہ بھی پڑھیں: دبئی کا مصروف ترین ہوائی اڈہ 2035 میں ہمیشہ کے لیے بند ہو جائے گا
امریکی فضائیہ کا منصوبہ ہے کہ کم از کم 185 ایف-47 جنگی طیارے حاصل کیے جائیں، جو موجودہ بیڑے میں شامل تقریباً اتنی ہی تعداد میں موجود ایف-22 ریپٹر کی جگہ لیں گے۔
