بارباڈوس ( پاک ترک نیوز) پاکستان اور ویسٹ انڈیز کے درمیان دو ٹیسٹ میچوں کی سیریز کا دوسرا اور آخری ٹیسٹ کل شروع ہو گا، میزبان ویسٹ انڈیز کو سیریز میں ایک صفر کی برتری حاصل ہے، جبکہ پاکستان کو سیریز برابر کرنے کے لیے لازمی کامیابی درکار ہوگی۔
دوسرے ٹیسٹ سے قبل پاکستان ٹیم کو بڑا دھچکا اس وقت لگا جب اوپننگ بیٹر شان مسعود انگلی کی انجری کے باعث میچ سے باہر ہو گئے۔ ٹیم انتظامیہ کے مطابق انجری کے باعث وہ دوسرے ٹیسٹ میں شرکت نہیں کر سکیں گے۔
یہ بھی پڑھیں: پاکستان ٹیم کو بڑا دھچکا، شان مسعود انجری کے باعث ٹیم سے باہر
قومی اسکواڈ کو مضبوط بنانے کے لیے عبداللہ شفیق اور سعود شکیل نے ٹیم کو جوائن کر لیا ہے۔ دونوں بیٹرز کی شمولیت سے بیٹنگ لائن اپ کو تقویت ملنے کی توقع کی جا رہی ہے۔
پاکستانی ٹیم پہلے ٹیسٹ میں شکست کے بعد دباؤ کا شکار ہے اور سیریز بچانے کے لیے دوسرے ٹیسٹ میں بھرپور کارکردگی دکھانے کی کوشش کرے گی، جبکہ ویسٹ انڈیز اپنی برتری برقرار رکھتے ہوئے سیریز اپنے نام کرنے کے عزم کے ساتھ میدان میں اترے گا۔
